Shillong, Iaiong 17: Ka Jaintia Students’ Union (JSU) Jowai circle kala kynduh ia u Chief Postmaster jong ka Jowai Post Office bad dawa ban leh eiei halor ki jingujor jong ki paidbah ba kynnoh ba lehmeng ki nongtrei post office.
“Ki nongshong shnong ki la pyntip ia ki jingjia jong ka jingbym burom, jingkren baheh bad jingpyni jinglong sngewheh haba ki wanrah ia ki parcel jong ki, kaba la wanrah ia ka jingeh bad sngew jah burom ia ki paidbah ka ri-lum Jaintia” ong u President Born Rupon.
Ha kane ka jingiakynduh, ka JSU ka la kdew ia ki kyndon jong ka Post Office.
“Kum kine ki jingleh daki nongtrei ka dei ka jingpynkheiñ ïa ka aiñ Post Office Act, 2023 bad ka Post Office Rules, 2024 kiba bthah ba ki nongtrei ki dei ban ai jingshakri daka burom ïa ki paidbah ba wan donkam, ban bat ïa ki shithi da ka jingkitkhlieh, bad ban bud ïa ki kyndon iada kiba biang khlem ka jingpyndik,” u la ong.
Ka JSU ka la ai daka dorkhas sha u Chief Postmaster, ha ryngkat ka kopi ba la phah sha u Superintendent of Post Office, Shillong Division, ba dawa ban shim mardor ia ki lad ki lynti ban pynbeit.
Katkum ka jingong ka JSU, u Chief Postmaster u la mynjur ban leh eiei halor katei ka mat.
“U Chief Postmaster u la mynjur ban shimkhia bha ïa kane ka kam bad u la pynthikna ba un wah ïa ki kyndon bad ki jingbthah kiba shai na ka bynta ki paidbah — ym tang ha ka ktien Hindi bad Phareng hynrei wat ha ka ktien Khasi khnang ba ki briew naki thain nongkyndong bad ki jaka ba jngai kin ym shah ïalam bakla ne shah pyndik,” ula ong.
U la ong ba ka JSU ka pdiang sngewbha ia kane ka jingkular bad kan iai bteng ban buddien ia kane ka kam.
 Jowai circle kala kynduh ia u Chief Postmaster jong ka Jowai Post Office bad dawa ban leh eiei halor ki jingujor jong ki paidbah ba kynnoh ba lehmeng ki nongtrei post office.){kind=link}