Shillong, Risaw 07 : Ka ri-lum Garo kan hap ap kham slem ban ioh ia ka elekshon jong ka Garo Hills Autonomous District Council. Ka Kynhun Myntri ka Sorkar Jylla ha ka sngi Balang kala ai jingmynjur ia ka jingtyrwa ban pynjlan biang sa 6 bnai ia ka samoi treikam ba mynta jong ka GHADC, kaba rah ia ka elekshon shaduh u bnai Iaiong 2027.
Ka jingpynbna ba 6 bnai jong ka sien ba nyngkong kan kut ha ka 17 tarik Risaw. Da ka rai ha ka sngi Balang, ka Sorkar kala pyndonkam lut ia ka shisnem ka jingpynjlan kaba long kat kum ka ain.
Haba kren sha ki lad pathai khubor hadien ka jingialang bala pyniaid da u Myntri Rangbah Conrad K Sangma, u nongaiktien ka Sorkar MDA bad Myntri Bah Wailadmiki Shylla ula ong “Ka don tang kawei ka mat ba iakren-ka jingpynjlan ia ka samoi treikam ka GHADC ba 6 bnai na ka bynta ban pynlong ia ka elekshon”.
Ula iathuh ba ia ka elekshon ym shym la lah ban pynlong kham hashuwa namar ka jingsniew ka jinglong ka suk ka sain ha ri-lum Garo.
“Kumba phi tip, namar jong kato ka jingjia kaba sngewsih kaba jia ha ri-lum Garo, ngim shym la lah ban pynlong ia ka elekshon bad ngi la pynjlan ia ka sa hynriew bnai” ula ong.
Ka jingpynslem, u ong ka don jingiadei bad ka jingphiah thymmai ia ki constituency bad ka Special Intensive Revision (SIR).
“Namar ngi hap ban leh ia ka jingphiah constituency bad SIR, bad ka kam ka dang iaid mynta, bad ka 6 bnai ba hashuwa kan kut noh ha ka 17 tarik Risaw, ngi hap ban pynjlan biang sa shisien” ong u Bah Wailad.
“Ka don ka kyndon kaba ngi lah ban pynjlan ia ka elekshon haduh shisnem, kata 6 bnai bad 6 bnai. Haba buh hakhmat ia ka jingphiah constituency kaba dang iaid bad ka ban sa pyndep shen, mynta ka sngi, ka Kynhun Myntri kala mynjur ban pynjlan biang sa hynriew bnai” ula ong.
“Ngi kyrmen ba hapoh ka hynriew bnai ngin sa lah pyndep ia ka elekshon GHADC” bynrap u Bah Wailad.
