Shillong, Risaw 07 : Ka jingiakhih ki nongiasaid ain kala nang jur ha ka sngi Balang da ka jingiamih iaid paidbah ki spah ngut ki nongiasaid ain ha Shillong, haba kynnoh ia ka Sorkar Jylla ba ka iada ia u Advocate General Amit Kumar wat hapdeng ki jingkular ba bun sien.
Ka jingiakhih, bala iasnohkti lang da ka kynhun na baroh ki district bar association, kala wan jia hashuwa ka jingialang bad u Myntri Rangbah hynne hi ka sngi.
U Secretary General ka High Court Bar Association Kishore Gautam ula ong ba ia ka Bar la pynbor ba kan mih biang sha surok namar u AG Amit Kumar u dang iai mihkhmat ha ki Iingkashari wat hadien ka jingkular u CM ba un nym mihkhmat shuh ia ka Jylla.
“Ngi la iakhih la katto katne por. Phi ia tip ba ngi la iashong jingialang bad u Myntri Rangbah. Ula ai ka jingkular ba u Amit Kumar un nym mihkhmat shuh ha ka High Court lane kino kino ki Iingkashari lane Tribunal ha Meghalaya. Hynrei hapdeng kine kiei kiei, u Amit Kumar u dang iai mihkhmat ha baroh ki iingkashai” ong u Gautam.
U iathuh ba dalade hi ula pyntip ia kane sha u Myntri Rangbah ka Jylla.
“Haba u AG u wan mihkhmat, Nga la pyntip sha u CM lyngba ka Whatsapp halor ka jingwan mihkhmat jong u namar ha ka jingialang ba khatduh ula ai ia u nombor bad ong ba lada don eiei phi lah ban pyntip sha nga. Hynrei ula mihkhmat man ka sngi, ym tang ha High Court hynrei ha ki trial court ruh kumjuh” ula ong.
“Ka I kumba ka jingkular jong ka Sorkar kam don jingmut eiei ha u. Wat ka kyntien jong u Myntri Rangbah kam don jingmut. Kumta ngi la shim ia kane ka sienjam sa shisien ban sangeh ka leit mih khmat sha ka Iingkashari bad mynta ka sngi ngi la pynlong ia ka rally” ong u Gautam.
U ong ba ka jingpyni ia ka bor ka pyni ia ka jingiatylli jong ki nongsaid ain.
“Mynta ka sngi phi la iohi ia kaei kaba jia. Shibun ki dkhot kila iadon hangne. Baroh ki ia ieng tylli kawei. Ka jingdawa jong ngi ka dang long kajuh- weng ia u Amit Kumar” ula ong.
“Ngim lah ban sngewthuh balei u Amit Kumar u long kongsan haduh katta katta, ki jingkyrpad jong ngi, ki jingialang jong ngi, ki jingthoh jong ngi, ym shym la jia eiei haduh mynta” ong u Gautam.
Halor ka jingkular ba kam dei da ka jingthoh, u Gautam ula ong “Kam don satia da ka jingthoh hynrei haba phai sha u CM, ngi dang mut ba ki jingkular jong u ki don jingmut eiei. Ngim dei ki riew madan, ngi dei ki nongiasaid ain. Ngi dang mut ba tad haduh ka 7 tarik Risaw u Amit Kumar un nym mihkhmat. Hashuwa u CM, ngi la iakynduh ruh ia u Symbud Myntri Rangbah bad kijuh ki jingkular kila mih hynrei ym shym la iohi soh eiei”.
Haba byrngem ban pynbun ia ki jingiakhih, ula ong “Ka rally mynta ka sngi ka long tang ban pyni ia ka jingiatylli halor ka jingbha lang jong baroh ki nongsaid ain kaba la sdang da ka High Court Bar Association bad Shillong Bar Association. Ngin dang bteng da kiwei pat ki jait jingiakhih. Ngin sa iashong jingialang jong ka EC jong baroh ki district bad ka High Court Bar Association bad sa shim rai ia kaei kaba ngin leh hadien”.
