Assam, Rymphang 29 : Ka United Opposition Forum, Assam ha ka sngi Palei kala phah ia ka dorkhas sha ka President ka Ri Droupadi Murmu ba pyrshah ia ka rules bala tyrwa ban pynmih paidbah, kaba iadei bad ka Citizenship Amendment Act (CAA).
Kila iakynduh ia u Lat ka Jylla Gulab Chand Kataria bad aiti ia ka dorkhas ka ban phah sha ka President lyngba jong u,ba kyrpad ba kane ka ain kam dei ia kaban pyntreikam hapoh ka Jylla rules bala tyrwa ban pynbna paidbah jong ka CAA.
Kine ki 16 tylli ki seng sain pyrthei ki kynthup ia ka Congress, All India Trinamool Congress, Aam Aadmi Party, left parties, Raijor Dal, Assam Jatiya Parishad (AJP).
Haba kren sha ki lad pathai khubor, ka Forum kala ong ba ki seng sain pyrthei bad ki paidbah ka Assam kila pyrshah jur ia ka Citizenship Amendment Act, 2019 naduh ka sngi ba wanrah ia ka ha Parliament. Hynrei sngewsih ka Sorkar BJP kala shim kabu ia ka jingbun paid hapoh Lok Sabha bad Rajya Sabha bad kala mynjur ia kane ka Bill khlem da patiaw ia ka jingsngew jong u paidbah ka Assam.
Ka Forum ka bynrap ruh ba u Myntri kam Pohiing ka Ri dang shen ula pynbna ba ka CAA kan treikam lang ha Assam hashuwa ka elekshon Lok Sabha. Namar kane ka act ym tang baka long be-riti hynrei kan sa ktah ruh ia ka Assam Accord u snem 1985 da kaba buh jingma ia ka histori, ka kolshor, ka ioh ka kot bad ka snap kyrpang jong ki paid Assamese.
