La pynskhem ia 7 tylli ki Unit ka NPP ha ka Shnong Jaiaw Pyllun
Shillong Nailar 19: U National Vice President ka NPP u Bah Prestone Tynsong, u la ong, ban ieid iaka jaidbynriew tang da ka jingsngew ka long lehnohei hynrei haba ieid iaka jaidbynriew dei ban pyni da ki kam bad kane ka long kaba donkam eh.
U Bah Prestone u la kren ia kitei ki kyntien haka jingialang pynskhem iaki nongkitkam jong ki 8 tylli ki Unit ka NPP na Jaiaw kaba hap ha North Shillong Constituency. Kane ka jingialang ka long hynne ka sngi thohdieng ha Community Hall jong ka Jaiaw Shyiap Lum Pyllon.
“Kum ki nongmihkhmat ngim dei ban long kiba shu don tang iaka jingsngew (Emotion). Ban ieid iaka jaidbynriew tang da ka jingsngew ka long lehnohei, ieid iaka jaidbynriew da ka kam bad nga tharai kane ka long kaba donkam eh” ong u Bah Prestone.
“Lah bun than kiba shu pyndonkam khlieh beij iaka kyntien ‘ieid jaidbynriew’ bad katba ngi dang kren ba ngi ieid jaidbynriew kata ngi dang hiar arsut, hynrei lada ngi kwah shisha ban ong, ba ngi ieid iaka ri bad jaidbynriew, ka sap ka phong kaba u Blei ula ai ia phi ia nga, kaba shai kdar ka long ba ngin noh synniang hala i jong i jong i bynta bad hala i jong i jong i sap i phong” ula bynrap.
U la ong, ki briew ki kynthoh bad bein iaka NPP ki dei tang namar ba ki bishni ba kadei tang ka seng NPP kaba ioh iaka jingithuh naka Election Commission of India (ECI) kum ka National Party na ka thain shatei lammihngi jong ka ri India bad ka NPP ka don ruh iaka ophis treikam ka jongka ha nongbah Delhi.
U Bah Prestone u la ong, ba dei ban jied ia u Bah Ransom namar u dei u briew uba proh bad uba la ih bha ha ki liang baroh ban shakri iaka Constituency baroh kawei bad lada shem ba bakla mar ia jop ha u 2023 kumta sa bret noh ia u ha u 2028.
Katba u Bah Ransom Sutnga u la ong, ba ka thong kaba hakhmat ka long ban wanrah iaka roi ka par, ban phaikhmat iaka jingeh ki samla kiba la nang la stad naba kim don iaka kam ka jam kaba pura bad ula buhthong ban ai jingkyrshan ia ki samla ka North Shillong ban long ki IAS khamtam haba ka jaidbynriew kala pynmih khatduh ia ka IAS ha u snem 2013 bad ula kular ruh ban leh eiei ia ki longiing baduk kiba don haka constituency ban ai jingkyrshan ia ki.
Ia kitei ki nongkitkam la pynskhem da u Working President ka NPP Meghalaya u Dr Donkupar War ha kaba la iadonlang u Kyrtong ka NPP na North Shillong u Bah Ransom Sutnga, ki nongialam jong ka NPP Shillong City bad NYPF bad ki paid nongkyrshan.
