Shillong, Lber 25: Ka Khasi Hills Autonomous District Council (KHADC) hynne ka sngi Balang, kala wanrah ia ka Mang Tyngka kaba T.34.44 Klur kaba dei ka Vote on Account ne kaba tang 6 bnai.
“Kane ka vote on account kaba long T.34,44,55,600 kan treikam naduh ka 1 tarik u Iaiong 2025 haduh ka 30 tarik u Jylliew 2025,” la ong u Executive Member in-charge Finance u Bah Seiborlang Warbah haba wanrah ia kaMang Tyngka ha ka sngi sdang jong ka Dorbar Mang Tyngka hynne ka sngi Balang.
Ula pyntip ba ia ka mang tyngka kaba pura yn sa wanrah biang ha ka dorbar kaban wan jong ka Council.
Ula ong, ba kane ka mang tyngka kan ailad ia ki Executive Member kiba khmih ia ki tnad bapher bapher ba kin ioh ban wanrah ia ki jingkylla ha ka dur jong ki jait jingsiew ki bapher bapher hapoh ka por jong kitei ki 6 bnai kaban kut ha ka 30 tarik u Jylliew.
U Bah Warbah ula pyntip ruh ba ia katei ka Vote on Account, kadei da ka jingthmu ban ioh siew ia ka tulop jong ki MDC, ki ophisar bad ki nongtrei ha ki tnad bapher (Executive, Legislative bad Judicial) kynthup ia kiba ioh ia ka bai bam tymmen ne Pension.
Na ka T.34.44 Klur jong ka Mang Tyngka la bhah T.8,52,29,550 Klur ia ka General Administration Department, T.17,65,910 Lak ia ka Law Department, T. 2,65,38,350 Klur ia ka Revenue Budget & Finance Department, T. 2,57,05,470 Klur ia ka Forest Department, T.1,70,52,930 Klur ia ka Administration of Justice & Judicial Department, T. 2,27,65,040 Klur ia ka Legislative Department, T. 3,87,640 Lak ia ka Education Department, T.15,82,93,940 Klur ia ka Civil Works & Development Department bad T.1,67,16,770 Klur ia ka Enforcement Scheme for protection of Tribal Land & Interest.
U Bah Warbah ula ong, ka Executive Committee ka kwah ba ka KHADC kan pyni ia ki nuksa kiba bha, ban wanrah ia ka jingsynshar kaba khuid bad kaba lait na ka bamsap katkum ka riti synshar ka ri.
“Ka EC ka thrang ruh ban wanrah ia ka rukom treikam kaba thymmai ban pynbha shuh shuh ia ka rukom treikam jong ka Council,” ula ong.
