Shillong, Risaw 27 : U Symbud Myntri Rangbah Bah Sniawbhalang Dhar ula pyntip ba ka jinglong jingman ha Shnong Lapangap kala sdang suki suki ban wanphai sha ka jingjai jai kumba ju long.
“Ka jinglong jingman kala sdang long biang kumba ju long ha shnong Lapangap. Ka jingot kba kala jan dep bad lehse ka lah ban dep lashai lane hapoh arsngi. Ka jingsuk kala wanphai pat hadien ka jingialang hapdeng ki Peace Committee ki paid Karbi bad ki Pnar” ong u Bah Sniawbha.
Halor ka jingdawa ban buh ia ka ktem pulit ba shipor, u Bah Sniawbha ula ong ba ka Sorkar kala buh ia ka ktem pulit ba shipor ha Lapangap, kaba don haduh 30—40 ngut ki Pulit ba kin peit ia ka shongsuk shongsain ha ka thain.
“Ki Pulit kila don lypa ha Lapangap bad ka ktem ba shipor ruh kala don ia kaba la buh da ka Ophis u SP. Nga ruh nga la ai ka jingiarap ban buh ia kane ka ktem, kaba jan long hi kum ka ktem ba shirta” ula ong.
U Bah Sniawbha u pyntip ba ki bor Sorkar buh ruh ia ki kynhun pynap jong ki pulit lada jia kano kano ka jingjia.
Haba kylli la ka Lapangap ka hap ne em ha ka jaka iakajia, u Bah Sniawbha ula ong ba ia kane ka jaka ym shym la kynthup satia ha ki jaka iakajia hynrei ki jingjia ba dangshen kila pynmih ia kane.
“Mynshuwa kam hap satia ha ka jaka iakajia pud, Hynrei, namar ki jingjia ba dang shen, kane ka jingiakren kala mih mynta. Kumta, ngi hap ban ap ia ki artylli ki regional committee ba kin pynbeit ia kane ka kam. Ka Lapangap, Khanduli-Psiar ki dei kiba dang hap sha Meghalaya. Hynrei, namar ba ka don ka jingiakajia, ngi hap ban peithuh bha” ula ong.
