Aizawl, Risaw 16: Ka Aam Aadmi Party (AAP) kala rai ban wan rung khlieh ha ka thain Shatei Lam Mihngi ka Ri da kaba sei kyrtong ban iakhun ha ka elekshon Assembly jong ka Mizoram ka ban long la 7 tarik Naiwieng.
Haba kren sha ki lad pathai khubor ha New Delhi hynne ka sngi Nyngkong, u Nongialam ka AAP ba khmih ia ka NE Rajest Sharma ula ong “Ngi la rai ban iakhun ia ka elekshon Mizoram ha kane ka kynti”.
U Sharma ula ong ba ha ka jingialang ba long hynnin ka sngi U Blei hapoh ka jingialam u National Convener Arvind Kejriwal, la rai ban pyniar ia ka lyngkha treikam jong ka Party bad ban iakhun ia ka elekshon ha kane ka Jylla jong ka thain Shatei Lam Mihngi.
U pyntip ba ka AAP kan sa thaw ia ka Coordination Committee bad ka North East Cell ban rung noh sha ki Jylla jong ka thain Shatei Lam Mihngi.
Ula pyntip ba ki paidbah jong ka thain Shatei Lam Mihngi kila khnium halor ki ishu bapher bapher kynthup ka pule ka dangle, ka koit ka khiah, ka jingkiew dor, ka jingbym iohkam bad ki ngeit ba ka AAP ka don ia ka lynti ban weng ia kine ki jingeh.
Da kane ka thong ha ka jingmut jingpyrkhat, ka party kala shim ia kane ka rai. Ha kane ka jingialang, u State Convener ka Nagaland, Asu Keyho bad Assistant Incharge ka Tripura Abuzam Umapada Luwang ruh kila iadonlang.
