Shillong, Nailur 04: Ka All Meghalaya Muster Roll Progressive Workers Union (AMMRPWU) ha ka sngi Thohdieng, kala jied ia u Adviser ba thymmai bad ong ba kan pynjur ïa ka jingbuddien ïa ki jingmat dawa bad ka Sorkar Jylla.
U General Secretary Bah Bympher Lyndem u la ong ba u Advocate Erwin K Syiem Sutnga u la shah jied kum u Adviser jong ka AMMRPWU, katba u Bah KL Pariat u dang bteng kum u Adviser jong ka Joint Action Committee.
U Bah Bympher u la ong ba ka Union ka la pynbeit thymmai ia ki nongkitkam jong ka bad mynta kan buddien ia ki jingdawa ba la ai sha ki tnad treikam bapher bapher, kynthup ia ka tnat Labour.
“Ngi la lah ban pynurlong katto katne ki jingdawa kiba ngi la buh ha khmat ka Sorkar” u la ong.
Hynrei u la ong ba ka jingpyntreikam ia ka employees provident fund (EPF) bad ka jingmynjur shuti iaki longkmie ka dang sahkut.
Ha kaba iadei bad ka EPF, u Bah Bympher ula ong ba la pynmih ia ki hukum ban pyntreikam hynrei don katto katne ki tnat treikam Sorkar ki bym pat pyntreikam.
“Ki don ki tnat kiba la pyntreikam bad ki don ki tnat ki bym pat pyntreikam” u la ong bad bynrap ba ka Union kan sa nang buddien nangne shakhmat.
Haba iadei bad ka shuti naka bynta ki longkmie, u la ong, “Ki don ki ophis kiba la pyntreikam bad ki don ruh ki bym pat pyntreikam”.
Haba ai khublei ia ka tnad Veterinary kaba la shim ia ki nongtrei muster roll bad thungkam iaki haka Group D, u general secretary ula ong, “Baroh 8 ngut ki nongtrei muster roll ki la ioh kam bad ngi kyrmen ba kiwei pat ki tnat kin bud ia kane ka nuksa”.
