Boko, Nailur 05 : Ka jingiakajia pud kala mih biang ha Langpih, West Khasi Hills hadien ka jingleit khang ki paidbah ba kyrshan ia ka Meghalaya, ia ka jinglum khana samari ha skul Noapara LP ha Langpih.
Ka kynhun ki paidbah na Meghalaya bala synran da ki Pulit ka Meghalaya, kila leit ban pyrshah ia kane ka jinglum khana samari, kaba la pynmih biang ia ka hurihura ha kane ka jaka khappud kaba don hapdeng ka jingiakajia.
Kat kum ka khubor ba ioh, u ki Rangbah Shnong Chankiya Marak bad Arthuch Sangma ha ryngkat ki Pulit ka Meghalaya, kila leit rung ha kane ka skul ban khang ia ki Nongtrei ka Sorkar Assam kiba dang pynrung kyrteng ia ki nongshongshnong.
Ka jingiania kaba jur kala mih ha kane ka skul, kaba la pynlong ia ki Pulit ka Assam ban hiar mardor bad ban tuklar. Ia kine ki nonglum khana samari la synran noh sha ki jaka ba shngain hadien ba kila pyndep ia ka kam bala bynshet ha ki.
Kane ka jingjia sa shisien kala pyni ia ka jingsynjor ka suk ka sain ha kane ka jaka khappud ka Assam-Meghalaya- bad ki nongshongshnong kila pynpaw ia ka jingsngewkhia halor ka jingiai mih ki jingjia iapyni bor ha ka thain.
U Arjun Chhetri, Executive Member ka Rabha Hasong Autnomous Council, ula kynnohba kum kine ki jingjia kila jia na ka por sha ka por namar ka jingduna palat ka jingtuklar jong ki bor synshar bad ka jingbym biang ki rukom ai pahara.
Haba kynthoh ia ka jingkam trai ia ka jaka, u Chhetri ula ong “Lada ki shnong Khasi-Garo ki don ha Dispur, hato ka Meghalaya kan kam ia ka nongbah ka Assam?. Ula kynnoh ba kane ka jingkam ban kam trai ia ka jaka kan wanrah ia ka jingiakajia kaba jur hane ka jaka khappud.
