“Ngim nang thiah baroh shimiet, ngi la shu pynkhreh ban iaphet lada jia kumno kumno”, ong ki samla pule
Shillong, Jymmang 06 : Da ka jingshimkhia sted jong ka Sorkar Jylla, haduh 66 ngut ki samla pule na Meghalaya, kiba pule ha ki jaka pule bapher bapher ha Imphal, ka Nongbah jong ka Manipur, kila wan poi suk hynnin ka sngi ha ka Lokpriya Gopinath Bordoloi International Airport ka nongbah Guwahati.
Ia kine ki samla pule la pdiang da ki Heh Ophisar ka Sorkar Jylla bad ki kynhun Sengbhalang ka Jylla. La wan ialam ia ki sha Jylla da ki bos bala pynkhreh da ka Sorkar Jylla. Kampher shano ba ki shong, ia kine ki samla la pynpoi sha Ri-lum Garo bad sha nongbah Shillong.
U Myntri Rangbah ka Jylla Conrad K Sangma ha ka sngi Palei u pyntip ba ki don kumba 200 ngut ki samla na Jylla Meghalaya kiba pule ha Manipur, khambun eh ha Imphal. Ula ai ka jingkular ba ka Sorkar kala shim ia baroh ki sienjam ha kaban pynthikna ba kine ki samla kin wanphai noh kham kloi da kaba suk bad ba shngain sha Jylla Meghalaya.
Ka jingkulmar bad jingiaumsnam kala khie ha ka janmiet sngi Balang ha Manipur, kaba la nang jur da ka jingialeh markylliang hapdeng ki paid riewlum khamtam eh hapdeng ka jaidbynriew Meitei bad ki Kuki, hadien ka rally Tribal Solidarity March bala pynlong da ka ATSUM ban pyrshah ia ka jingdawa jong ki Meitei ban ai jingithuh kum ki Scheduled Tribe.
Haba iakren bad u Nongai khubor Ka Shlem, uwei na kine ki samla pule Joyshelman D Sangma ula ong ba ki shipai Indian Army kila synran ia ki naduh na ki hostel shaduh ka Imphal Airport, ha kaba kila iakynduh ia ka Kynhun bala phah da ka Sorkar Meghalaya bala ialam da I Myntri ka Koit ka Khiah Kong Ampareen Lyngdoh.
“Kane ka dei ka sien ba nyngkong ba ngin mad ia kum kane ka jingjia….ngi la ju iohi tang ha ki phlim bad ki lad pathai khubor kum ka thma Ukraine bad Russia hynrei mynta ngi sa sakhi dala ki jng ki khmat” ula ong.
“Ka jinglong jingman kala shongsyier bha, ngim nang thiah shuh mynmiet, kala don ka jingiawiang ding ia ki kali, ki iing kat shaba phai, shabar ka phyllaw ka jaka pule bad wat ha ka Nongbah Imphal baroh kawei…Ngi la sheptieng bha ia kaei kaban jia ia ngi…ym don nong pahara satia ia ka campus jong ngi…ngim nang shuh ban thiah mynmiet” ula iathuh ia kaei kaba jia.
Iwei pat I samla pule, Lanosha Bareh ila ong ba baroh ki samla pule kila rit mynsiem haba ioh jingtip ia ka jingiakulmar bad iohsngew ia ka jingiather kuli bad jingbthei bomb hajan ka jaka ba ki iasah.
“Kumba 9 baje eiei (ha ka 3 tari Jymmang 2023), ngi la iasah ha ka jaka kaba jur ka jingkulmar..kala sdang kynsan kynsan bad hadien la mih sa ki jingiather kuli, kala don ka jingbthei bomn, kawang bomb bad hangne ngi la sdang ban rit mynsiem…namar ka jaka kaba ka college jong ngi ka don bad kumjuh ruh ka hostel, ka dei kaba tawiar da ki riewlum, kumta ka jingkulmar ruh ka jur bha ha kane ka jaka” ila ong.
“Baroh shimiet naduh ba ka sdang haduh mynta, ngi la shu ia im hapdeng ka jingtieng…ngim tip satia ia kaei ka ban jia hadien. Ngi la shu pynkhreh ialade, lum lang ia ki kot ki sla ba donkam, ia baroh ki tiar ba donkam bad ngi la shu pynkhreh beit ba lada jia kumno kumno ngin shu iaphet beit” ila iathuh.
I Lanosha I iathuh ruh ba bun ki samla pule kila rit mynsiem biang hadien ba ki poi ha kadliengsuin namar ka liengsuin kala slem. Kila rit mynsiem da kaba pyrkhat ba ka Sorkar kam shym la shimkhia satia ban leit iarap ia ki, hynrei hadien la ioh jingtip baka don ka jingslem ban iaphah ktien namar ka jingkhang internet da ka Sorkar Manipur.
