Wan iasyllok ka Consul Genl ka Australia ia ka MSOA halor ki prokram hikai pyntbit ia ki nongialehkai

Shillong Naiwieng 29: Ka Australian Consul General ka Rowan Ainsworth, hynne ka sngi Balang kala iakynduh ia ki nongkitkam ka Meghalaya State Olympic Association (MSOA) Podium Finish Committee ban iasyllok halor ki jingtreikam ka Talent Identification Program (TID), Ka Elite Pathway Program (EPP) bad ka Super Elite Pathway Program (SEPP).

Ha katei ka jingiasyllok la ia don lang u Bah John F Kharshiing, Working President ka MSOA, ka Kong Matsiewdor War Nongbri kaba long ka Vice President, u Bah P Laloo u Joint Secretary bad Bah Dipshon Rynthathiang u Chairman ka Podium Finish Committee ka MSOA, kiba la batai bniah halor ki rukom treikam kitei ki program da ka jingiarap ki Olympian na Australia bad da ka jingkyrshan borbah na ka tnad Department of Sports and Youth Affairs Government of Meghalaya.

U Bah John Kharshiing ula iathuh ba ka Australian Consul General kala pynpaw ka jingkmen ban iohsngew ia ka jing maitphang ka MSOA da ka jingkyrshan ka tnad DSYA ha kaban pyndonkam ia ki Olympian na Australia ban sei ia ki rangkynsai ha ka Sport bad kala pynpaw ia ka jingkmen ba ka jylla Meghalaya kala jam shakhmat kumba leh kiwei ki jylla hapoh Ri India bad kala ong ruh, ba ka ri Australia ka dei ka Ri ha kaba ki paidbah ki da ia shim bynta bha ha jan baroh ki jingialehkai sports.

Ula iathuh, ba ka Rowan Ainsworth, kala ioh ia ka jingpynshai halor ka SEPP program ka don ruh ka bynta ban ialam ia ki 12 ngut ki nongialehkai SEPP bad ki katto katne ngut ki Coach sha Australia ban iashimbynta ha ki Tournament sha ri jongki kum shi bynta ban tynjuh bad bad ban ailad ba kin ioh shem ia ki rukom long ha ki jingialehkai shabar ri.

Hadien kane ka jingiakynduh katei ka longheh kala iohlad ban iakynduh ia u Myntri Rangbah ka jylla u Conrad K Sangma, ban ia syllok shuh shuh halor kumno ban pyniajan ia ka ri Australia bad ka Meghalaya bad India ha kiba bun ki liang.