Shillong, Naitung 11: Ka East Khasi Hills kala long ka District kaba wan hakhmat duh ha ka jylla ha ka jingpyntreikam iaka Jal Shakti Abhiyan-Catch the Rain programme (JSA-CTR).
Ia katei la pynbna da u Angshuman Dey u Joint-Secretary jongka Ministry of DONER bad u Secretary ka North Eastern Council, uba long ruh u JSA-CTR Central Nodal Officer jong ka East Khasi Hills District, hynne ka sngi Palei ha ka jingkhmih bniah ia ka prokram ha ka jingialang kaba la long haophis treikam jong ka Deputy Commissioner.
Ka East Khasi Hills hapoh jong katei ka prokram kala tei 3526 ki jingtei kiba iadei bad ki um. Ka district kala lah ban leh ia ka map ha kaba iadei bad ki bynta ki bapher bapher kum ka jingtei ia ki ban pynneh pynsah ia ka um, ka jingpynlang ia ka um slap, ban shna pynbha ia ki rukom pynlang um tynrai bad ban tei ia ki jingtei ki bapher bapher.
Kitei ki jingtreikam kiba la shim bad leh da ki tnad bapher bapher kum ka Soil & Water Conservation, Block Development Office, Water Resources, Public Health Engineering, Forests & Environment Department bad kiwei kiwei.
Nalor kane, la thaw ruh ia ki district bad ki block level committee bad kitei ki committee ki don ha ka bynta ban pynkhreh ia ki plan na ka bynta ban don ka jingshngain ia ka um ha ki district.
Ka Ministry of Jal Shakti kala sdang ia ka JSA ha u 2019 ha kaba na ki 1,592 Block na ki 2,836 Blocks ha ki 256 tylli ki Distrik kiba duna um ha ka ri.Ha u 2021, ka JSA-CTR (Catch the Rain) la pyllait paidbah da u Myntri Rangbahduh ka ri u Narendra Modi.
U Angshuman Dey, ula iaroh ia ki kam kiba la leh da ka District bad ula ong ba ki dang bun shuh ki bynta ia kaba ka District bad ki Kynhun ka Block ki lah ban leh na ka bynta ban pynbha shuh shuh da ka jingpyndon bynta lang ia ki kynthei kum shi bynta jong ka Nari Shakti sha ka Jal Shakti campaign.
Ula kyntu ruh ia ka Distrik ban pyntreikam bad pynbha ia ka Jal Shakti Kendra ban long kum ka jaka ai jingtip na ka bynta ki nongshong shnong ban ioh ia ki jingtip bad ki jingiarap ha ka jingpyntreikam ia ka Jal Shakti Abhiyan.
Ha katei ka jingialang, na ka liang u Bah S Warjri, Additional DC jong ka East Khasi Hills ula ai ia ka jingbatai kaba bniah ia ka jingpyntreikam ia katei ka prokram ha ka District.
.){kind=link}