Shillong Naiwieng 27: U Co-Chairman ka Meghalaya State Planning Board u Bah John F Kharshiing, hynne ka sngi Nyngkong, ula pyntip ba ka don ka jinglait kam haduh 200 tylli ia kiba nang kren phareng hapoh Ri Slovakia, ka ri kaba don ha syndah bad ka ri Poland.
U Bah John ula iathuh ba ia kane la pyntip da u Yash Gurung, CEO & Founder Director, Asporea, Siliguri bad ki officer jong u, kiba la wan iakynduh ia u hynne ka sngi kum u Co-Chairman ka MSPB jong ka jylla ha ka jingwad ia ki samla jong ka thain Shatei Lam Mihngi kiba kwah ban leit trei sha katei ka Ri.
“Katei ka kynhun kaba na Siliguri ka dei kaba don ki jingiadei ha ki Ri bapher bapher bad kila pyntip ba ia mynta ki don 200 tam ne duna ki kam ha ka kharkhana shna kali Peugeot 208, Citroen C3, jong ka Company Stellantis, Slovakia bad ka jingsiew ka long T.63000 haduh T.72000 shi bnai bad ka don ruh ka jingsiew kaba heh ia kiba trei palat ia ka por (extra time) lada ki nongtrei ki dei kiba smat bad kiba trei shitom” ong u Bah John ha ka kyrwoh khubor.
Ula pyntip ba katei ka kynhun kala don ka jingiateh bad ka kynhun pynioh kam kaba heh na Kathmandu, Nepal kiba la don lypa ki jingiadei bad katei ka kharkhana shna kali, ha kaba ki don ka lad ban pynioh ia kitei ki kam lada ki nongwad kam ki don ia ka jingtbit.
U Bah John ula ong, ba katei ka kharkhana kali ka dei kaba heh bad ka shna 62 tylli ki kali ha ka shi kynta bad ki pynmih haduh 1395 tylli ki kali ha ka shi sngi ha Slovakia.
Ula iathuh ba ha katei ka kynhun kala mynjur ia ki jingai jingmut jongu ban pynbeit ia kane ka kam bad ki heh jong ka tnad Labour ka sorkar jylla ban ia kren sngewthuh bad ban ia trei ryngkat ban shim ia ki lad ki lynti ba ki samla ITI/ Politechnic bad kiwei kiwei kiba napoh Meghalaya kin lah ban shim ia katei ka kabu ban mih shakhmat ban trei shitom ban poi sha kitei ki kam.
U Bah John ula pyntip ruh ba ki don ruh ki kam kiba bun jait kiba kane ka kynhun kala don lupa ki jingiadei bad ki Ri bapher bapher bad ka don ka jingdawa kaba jur ia ki nongtrei kum ki nurse, ki nongtrei ha ki hospital bad kiwei kiwei ha Japan bad Germany tangba ha kitei ki Ri donkam ban Pass ha ka ktien Japan bad German.
