Shillong, Risaw 15: Ki rang ialehkai kriket ka Meghalaya ki la ieng iakhun tyngeh ban pynliem ia ka Nagaland da 7 ron ha ka U-19 men’s Vinoo Mankad Trophy, ba la long ha Chandigarh mynta ka sngi.
Ka khana jong kane ka jingiakhun ka long ba ka Meghalaya kaba la ailad ban wan ban tied nyngkong ka la lah ba kan kamai 155 ron hadien ba ka la lap ba hap baroh ki wiket ki jong ka ha ka 48.3 over.
Hadien kane, haba la dei ka pali ban bol, ki rang ialehkai ka Meghalaya haduh ka over kaba khatduh ki la lah ban pynhap lut ia ki wiket ka Nagaland kaba la lah ba kan kamai 148 na ki 49.1 over.
Ka Nagaland ka la mad ia ka jingeh ha ka jingwan ban beh ka jong ka ia kane ka thong hadien ba ka la lap ba hap haduh 6 wiket hadien ba ka la lah ba kan kamai tang 38 ron, ha kaba u Apandanka Marak, u la lam khmat ban khur 4 wiket naka bynta 18 ron na ki 10 over.
Hadien kane, u kapten ka Nagaland u Aloto Sumi, u la pyrshang ban lam khmat ia la ka kynhun hadien ba u la kamai 66 ron ba la wan na ki 139 tylli ki bol bad ban seng ia ka nongrim kamai ron paralok kaba 61 ron bad u Anurag Gupta (13 na ki 54).
Pynban ha ka khyllipmat ba kine ki arngut I kumba kin knieh ia kane ka namjop na ki kti ka Meghalaya, u Mewankitbok Kharpuri (1/33 na ki 10 overs) bad u Benedict Jones Makdoh (2/16 na ki 10), ki la treibor bah ban pynhap ia ki wiket kiba sah ka Nagaland. Kaba hangne sa shisien u Aloto ryngkat bad u Ravi Kumar, ki la seng biang ia ka nongrim kamai ron kaba 23 ron hapdeng jong ki, pynban ha kaba kut u Aloto u la run out noh ha ha ka bol ba nyngkong ka over kaba khatduh, kaba pynlong ia ka kynhun ka Meghalaya ban shad kmen naka bynta ban khur ia kane ka jingjop.
