Shillong, Risaw 17: Ka Meghalaya ka la lah ba kan khur ia ka jingjop kaba long da 7 ron ha ka lympung ialehkai jong ka U-19 Vinoo Mankad Trophy ki khynnah shynrang, ha kaba ka la jop ia ka Mizoram ha ka jingiakhun ba la long ha Chandigarh mynta ka sngi.
Kane ka jingjop, ka jia ryngkhat ba ar sngi mynshwa kane ka juh hi ka kynhun ka la lah ba kan pynliem ia ka Nagaland, kaba long da shisha ka jingiakhun kaba tyngeh bha da ki khynnah ialehkai ka Meghalaya, ha kaba u Ashish Kumar Lohar, u la lah ban paw bad tyngshain bha ialade bad ka bet, hadien ba u la lah ban kamai 32 ron ba la wan na ki 30 tylli ki bol, kaba la pynlong ia ka Meghalaya ba kan kamai 127 ron na ki 49.3 over.
Haba la wan pat ban bol, ki rang ialehkai ka Meghalaya la lam khmat biang da u Ashish, hadien ba u la ioh ban khur 8 wiket naka bynta 29 ron na ki 9 over, bad ioh pynhap lut ia baroh ki wiket ka Mizoram hadien ba ki la lah ban kamai 120 ron na ki 27.3 over,
Nalor u Ashish, u Namewanhi Pakyntein u la lah lem ban noh synniang sha u sup u thiar kamai ron ka Meghalaya hadien ba u la lah ban kamai 23 ron b a la wan na ki 46 tylli ki bol, katba na ka liang ki nongkawang bol ka Mizoram u Malsawmmuanzela u la ioh ban khur 4 wiket naka bynta 21 ron na ki 10 over.
Kumban shu pynkynmaw ba ka lynti iaid ia ka Meghalaya ha kane ka lympung ialehkai mynta ka samoi ka la sdang shwa ban mad ia ki artylli ki namrem na ki jingiakhun kiba shakhmat bad ba ka la lah pat ba kan pynkut da ki lai tylli ki nam jop, kaba lehse kan long ka resol hiar iakhun kaba pynkmen, pynban ha ka liang jong ka batting, kadei ka bynta, kaba kum ka kynhun kan dang donkam ban kham trei shitom ban pynjanai shuh shuh ialade katba kane ka lympung kan dang jam shakhmat.
Lah ban hap ia sam point noh ha ka Ranji Trophy
Shillong: Haba phai pat sha ka lympung ialehkai ka Ranji Trophy 2025-26 plate group, kumba ka long ia mynta ka Meghalaya bad ka Mizoram imat kin hap ban shu ia sam noh ka point ka jong ki tang namar ka daw ba wat haduh ka sngi kaba lai ym shim la iohi dak ba ka jingiakhun kan lah ba kan jam shakhmat, tang namar ba ka jinglong ka madan hi ka long kaba sngem bad kam rkhiang bha.
