Shillong, Risaw 17 : Ka Iingkashari Meghalaya High Court kala pynkynriah ia ka jingshong bishar ia ka mukotduma ba iadei bad ka jingpynkynriah ia ki 342 tylli ki Longiing na Them Metor tad haduh u bnai ban wan, kaban ailad ia ka Sorkar bad ka Harijan Panchayat Committee ba kin wad ia ki lynti ban iapynbeit lyngba ka jingiakren.
Ia kane ka hukum la pynmih da ka Iingkashari Division Bench ba kynthup ia u Chief Justice Soumen Sen bad u Justice W Diengdoh ha ka sngi Thohdieng, hadien ba pyntip ba ki liang mamla kila sdang ia ka jingiakren bad ia ka jingiakajia ruh ka dei kaba lah ban iapynbeit hapdeng jong ki.
“Namar kane, ia kane ka kam la pynkynriah ban bishar tad haduh ka 17 tarik Naiwieng 2025. Ngi kyrmen bad ngi shaniah ba hapoh kane ka por bala buh, ka jingmut kaba bha kan jop bad kine ki liang mamla kin pyrshang kat kaba lah ban pynbeit noh ia ka jingiakajia da ka jingiasngewthuh jingmut” ong ka Iingkashari.
Dang shen, u Symbud Myntri Rangbah ba khmih ia ka Tnad Urban Affairs Bah Sniawbhalang Dhar, ula pyntip ba ka Sorkar Jylla kala ithuh ia ki katto katne ki jaka na ka bynta ka jingtyrwa ban pynkynriah ia ka Them Metor.
