Shillong, Risaw 12: U Mewankitbok Kharpuri, u la lah ban khur 5 wiklet naka bynta 32 ron ha ka jingiakhun Meghalaya pyrshah ia ka Manipur, pynban naka daw ka jingbym lah ban ialehkai bha ki batsman, ka pynlong ia ka Meghalaya ba kan mad pat ia ka nam rem kaba long da 172 ron ha lympung ialehkai ka U-19 men’s Vinoo Mankad Trophy 2025-26 plate group, kaba la long hynnin ka sngi ha Chandigarh.
Ka Manipur hadien ba ka la jop ia ka jingkynting pisa (toss) ka la kam trai ba kan tied nyngkong, ha kaba ka la lah ba kan kamai 236 ron na ki 43 over, pynban haba dei ka pali ban wan beh ia kane ka thong, ka Meghalaya ki la lah ba kin kamai tang 64 ron bad lap ba hap lut baroh ki wiket jong ka ha ka 22.3 over.
Kane kan dei ka namrem kaba ar sien lynter ia ka Meghalaya ha kane ka lympung, namar shwa ia kane ka la shah liem noh da 4 wiket hakhmat ka kynhun ialehkai ka Sikkim.
Nalor u Mewankitbok, u Angkit Tamang (1/20), Benedict Jones Makdoh (1/32) bad Ashish Kumar Lohar (1/36) ki la ioh ba kin ia khur lem mar shi wiket.
Haba la dei ka pali ban wan beh ia kane ka thong, ki arngut ki batsman ka Meghalaya kiba la lah ban ia kamai bun ron ki long tang u Gaurav Narleng (25 na ki 30 balls) bad Dipayan Nandi (12 na ki 13 balls).
Ka jingiakhun kaban wan ia ka Meghalaya kan long lashai ka sngi pyrshah ia ka Arunachal Pradesh.
Katba ka resol na ka lympung ialehkai jong ka Senior Women’s T20 Trophy 2025-26 plate group, ba la pynlong ha Agartala, ki thei ialehkai ka jylla kim shim la lah satia wat tang ban ioh iuh kjat ha madan, na ka daw ba u slap uba jur um shim la ailad ia kane ka kynhun ba kan ialehkai pyrshah ia ka Arunachal Pradesh.
