Shillong, Naiwieng 23: Ka Vidarbha kala pynrem ia ka Meghalaya da 32 run ha ka jingiakhun kaba nyngkong jongka Vijay Hazare Trophy 2023-24, ka One Day Tournament na ka bynta ki shynrang, kaba la pynlong da ka BCCI ha Jaipur hynne ka sngi.
Ka Vidarbha kala tied nyngkong bad kamai 243 run, 9 wiket ha ka 50 over, katba ka Meghalaya kala kamai 211 run bad out lut ha ka 48.1 over.
U Dippu Ch Sangma ula ioh 4 wiket bad ai 43 run ha ka 10 over, u Akash Kumar Choudhary ula ioh 2 wiket bad ai 47 run, u Raj Biswa, u Anish Charak bad u Swarajeet kila ioh khur marshi wiket.
Ka kynhun ka Meghalaya haba kala leit ban tied, u Kishan Lyngdoh ula lah ban kamai 57 bad u Swarajeet Das ula kamai 44 run, u Raj Biswa ula kamai 24 run bad u Nakul Verma ula kamai 34 run.
Watla ka Meghalaya kala mad ia ka jingrem, hynrei ki nongialehkai kila ialehkai bha ban tehlakam ia ka Vidarbha ka kynhun kaba khlain, ba kan ym lah ban kamai bun ka run.
Ka Meghalaya kan iakhun pyrshah ia ka Chhattisgarh ha ka sngi Saitjaiñ.
