Shillong, Dec 20: Ka Meghalaya Cricket Association kala pynbna ia ka kyrteng jong ki nongialehkai ki ban iashimbynta ha ka BCCI’s Senior Men’s One Day Tournament, ka Vijay Hazare Trophy 2024-25, ha kaba ka Meghalaya kan iakhun pyrshah ia ka Himachal Pradesh ha ka jingiakhun kaba nyngkong eh kaban long ha Mumbai ha ka sngi Saitjain.
Ki 15 ngut ki nongialehkai ryngkat bad ki nongialehkai kiba la pynap lypa ne ki Standby na ka bynta ki ar tylli ki jingialehkai, la jied da ka Senior Men’s Selection Committee ha kaba yn sa khmih bniah biang ia ka rukom ialehkai ka jongki ha kitei ki ar tylli ki jingialehkai. Ka Meghalaya kan iakhun pyrshah ia ka Railways ha ka 23 tarik u Nohprah.
U Akash Kumar Choudhary ula shah jied ban long kum u Captain ka Meghalaya katba u Lerry G Sangma yn long u Vice Captain bad kane ka kynhun kadei kaba la khleh lang da ki nongialehkai kiba la ialehkai bunsien bad ki nongialehkai kiba dang thymmai.
Ki nongialehkai ka Meghalaya ki kynthup ia u Arien Bonchang Sangma, Arpit Bhatewara (WK), Lerry G Sangma (VC), Roshan Warbah, Kishan Lyngdoh, Md Nafees Siddique, Robert Sangma, Riboklang Hynniewta, Akash Kumar Choudhary (C), Himan Phukan, Nishanta Chakravarty, Aryan Borah, Adarsh Joshi, Ibitlang Thabah bad u Swarajeet Das.
Katba ki Standby ki kynthup ia u Pringsang Sangma, Wanlambok Nongkhlaw, Chengkam Sangma, Pankaj Mandal bad u Yogesh Tiwari bad ki Support Staff ki kynthup ia u Prabhakar Bairgond (Head Coach), Moisten Ch Marak (Assistant Coach), Surojit Biswas (Physio), Vikash Singh Chauhan (Trainer) bad u Amit Singhania (Manager).
