Shillong, Nailur 24 : U MLA ba shah sospon ka VPP na North Shillong Bah Adelbert Nongrum, ula ujor pyrshah ia ka jingpyndonkam khlem jingbit ia ka jaka Sorkar ban pynlong jaka kamai, ha ka jaka ba la ai sha ka Civil Service Officers Housing Society Ltd ha New Shillong Township.
Ha ka mudui bala ai sha u Secretary ka Tnad Urban Affairs ha ka sngi Balang, u Bah Adelbert ula aipor 30 sngi ia ka Tnad ba kan sa ia ka jubab da ka jingthoh, ba batai bniah ia ki sienjam bala shim, lem kumta u lah ban shim ia ka lynti ban mudui da ka mukotduma.
U Bah Adelbert ula kynnoh ba ka jaka bala ai sha ka Civil Service Officer Housing Society Ltd, la pyndonkam kum ka Institute Guest House na ka bynta ka Indian Institute of Management (IIM) Shillong, kaba pynkhein ia ki kyndon ai jaka.
Kat kum ka jingong jong u, ka jubab ia ka jingkylli bala wanrah ha ka Dorbar Synrai ba dang shen ka Iingdorbar Thaw Ain, u Symbud Myntri Rangbah ka tnad Urban Affairs ula ai ia ki jingtip ba pynthikna ba la pyniaid ia ka IIM Shillong Institute Guest House na ka Building ha ka Plot No 27 ha Lum Jingsuk Homes, New Shillong Township, Mawdiangdiang, kaba la ai ha ka kyrteng jong u Bah DP Wahlang (Ban shna Iingsah).
U Bah Adelbert ula kdew ba ka deed ban ait/shimti ia ka No.MUDA.14/2007-08/15 ba 20 tarik Jymang 2009, la kren shai ba ia kane ka jaka dei ban pyndonkam thik tang ia ka kam bala buh.
