Nongpoh, Nailur 19 : Ka Meghalaya Film Maker Association (MEFILMA) Ri Bhoi District, ha ka 18 tarik Nailur, kala leit ban ujor sha u Deputy Commissioner ka Ri-Bhoi District, halor ka jingduhlad ki samla donsap ha ka rwai ka siaw, ka put ka tem bad ka shad (artist) na Ri-Bhoi, ban iadon bynta ha kino kino ki tamasa ba pynlong da ka Sokar Jylla.
Ka MEFILMA kala pynpaw ba ka Sorkar ka dei ban ai rynsan lem ia ki artist na Ri-Bhoi district ha ki tamasa bapher bapher ba ju pynlong hapoh ka Jylla.
U President ka MEFILMA Ri-Bhoi Bah Lansius Syiemlieh ula pynpaw ia ka jingsngewdiaw ba ki local artist na Ri-Bhoi kim ju iohlad satia ban iashimbynta ne ioh rynsan lem ha ki tamasa ka Sorkar khamtam kiba pynlong ha Ri-Bhoi District.
“Ki artist na Ri-Bhoi kim ju ioh satia ban iashimbynta ha ka tamasa Cherry Blossom kaba la long bun tylli ki snem khamtam ha u snem bala dep bala pynlong ha Ri-Bhoi District. Kane kala pynduh mynsiem bha ia ki” ula ong.
U pyntip ba u DC ula kular ba un sa pynsngew ia kane sha ki bor Sorkar ba kan leh eiei ha ka Cherry Blossom 2024 ka ban long shen ha Bhoirymbong.
