Shillong, Nailar 31: Ka Khasi Students Union (KSU) lyngba ka Education Cell, hynne ka sngi Balang, kala leit ban ujor sha ka Meghalaya Board of School Education (MBoSE) halor ka jingialam bakla jong ka kot Social Science ki khynnah klas-X na ka jingthurmur jong u Nongthoh kane ka kot.
Ka KSU hapoh ka jingialam u Education Secretary samla Raymond Kharjana, kala leit iakynduh markhmat ia u Joint Director ka MBoSE Bah M Marbaniang ban pyntip ia kane ka jingthurmur jong u nongthoh jong ka kot Social Science ki klas X.
Kat kum ka jingong ka KSU, kane ka jingthurmur kala paw na ka jingpynhap ia ka Eastern West Khasi Hills District hapoh ka thup jong ka Ri-lum Garo.
“Ngi kala iakynduh ia u Joint Director ka MBOSE bad ngi la pynpaw ia ka jingbynñiaw halor ka jingthurmur ka rukom thoh kot khamtam eh iaka kot Social Science kaba ju jia man la ka por” ong u samla Raymond.
Une u Samla Nongialam ula pyntip ba u Joint Director ula kubur ia ka jingbakla ha kane ka kot bad pyntip ba ka Board kan sa phah pynbeit mardor ia kane ka jingthurmur.
“Une u Ophisar ula kubur ruh ba ka don ka jingdkoh ha ka rukom khmih bniah jong ka Board ia ki kot hashuwa ban pyllait ia ki kum ki kot pule naka bynta ki khynnah pule ha ki kyrdan bapher bapher” ula pyntip.
Namar kane, ka KSU kala dawa ia ka MBoSE ba ka dei ban pynrung noh ia ki kot bala thoh da ki Trai Ri khnang ba kum kine ki rukom thoh kulmar ia ki kot pule kan ym jia shuh ha ki snem ban wan, kiba lah ban ialam bakla ia ki khynnah skul bad ki samla pule.
