Nongpoh, Lber 15 : Ka Joint Action Committee (JAC) jong ka Hima Sohiong kala ujor sha u Deputy Commissioner ka Ri-Bhoi District halor ka jingkynnoh kyntur pud jong ka Sorkar Assam hapoh ka shnong Nongwah Mawtamur ban shna surok.
Ka JAC-Hima Sohiong kala iakynduh markhmat ia u Deputy Commissioner ka Ri-Bhoi bad aiti ruh da ka dorkhas ba pyntip ia ka jingwan dakhol jubor ka Assam ia ka jaka ha Nongwah Mawtamur, kaba dang hap hapoh ka Hima Sohiong.
Lah ban kdew hangne ba ka Nongwah Mawtamur kaba hap hapoh ka Jirang Constituency, ka dei ka jaka kaba la ithuh kum kawei na ki 12 tylli ki jaka ba don ha ka jingiakajia pud hapdeng ka Assam bad ka Meghalaya. Kane ka Shnong ka don ha ka thup iakren pynbeit pud jong ka kylla kaba ar hapdeng ki Myntri Rangbah ka Assam bad Meghalaya, kaba dang sahteng mynta.
U Chairman ka JAC-Hima Sohiong Bah Purningstar Shabong, ula pyntip lyngba kane ka dorkhas ba ka Sorkar Assam kala sdang ban pyntrei ia ka surok ha ka thain (Nongwah Mawtamur) naduh ka 1 tarii Nailur 2022, da kaba sdang pynpei surok naduh ka shnong Rani bad pyniaid lyngba ka shnong Kynthong Paham, Damu Paham, Umterlet, Pathar Khariong bad kumjuh ruh na Lukhra, Garobhanga, Mawtyrkhong, Jalut Rim, Jalut Thymmai ban mih sha Mawtamur.
“Ki bor ka Hima Sohiong ki dap da ka jingsngewkhia kaba jur halor ka jingbym burom ka sorkar Assam ia ka Status Quo ba la ia soi hapdeng ka Meghalaya bad Assam” ula ong haba bynrap “Ka Assam kala iai bteng ban pynibor wat ban tei ia kane ka surok bad kumjuh ruh ia ka Ophis jong ka Tnad Forest ha ka thain”.
Ka JAC kala kyntu ia ka Sorkar Jylla ban tuklar mardor ha kaban pynsangeh ia kane ka jingkyntur pud jong ka Assam khnang ba kan nym mih kano kano ka jingjia ba sngewsih ha ka thain.
Ha kajuh ka por, ka JAC kala dawa ia ka Sorkar Jylla ban pynbiang ruh ia ki bor pulit ban pahara ha ka thain Nongwah Mawtamur khamtam ia ki paid nongrep kiba ju leit ban rep ban riang.
Kala pyntip ruh ba dang shen, ki bor pulit ka Assam kila byrngem ban pynduh noh ia uwei u tower ba don ha ka thain lada ki paidbah kim ai ka jingiatreilang ha ka jingpyntrei ia kane ka surok ha Nongwah Mawtamur.
