Shillong, Naitung 02 : Ka Hynniewtrep Youth Council (HYC) kala ai ka jingujor pyrshah ia ka jingkynnoh trei torti ia ka surok na Mustoh sha shnong Shella, East Khasi Hills District.
Ha ka shithi sha u Assistant Executive Engineer ka PWD (Roads) Shella Sub Division ba la aiti ha ka sngi Saitjain, u Vice President ka HYC Shella B Natep ula pyntip ba ki dkhot ka HYC kila pynlong ia ka jingjurip ia kane ka surok hadien ka jingioh pdiang ia ka jingujor na ki paidbah.
Ula iathuh ba ki dkhot kila lap ba kane ka surok kaba dang shu dep maramot dang shen, kala jot biang namar ka jingtrei torti palat ia ka kam.
Kane ka surok kala mih thliew bad kane kala ktah ia ka leit ka wan ki paidbah ba pyndonkam ia kane ka surok.
Ula kyntu ruh ia ka Tnad ban phah maramot biang mardor ia kane ka surok bad ban siang ia ka jingrben ka rong kat kum ka work order.
Pule lang ia kane: Jingbatai : Kaei ka Uniform Civil Code, Kumno ka Riti Synshar ka Ri ka ong halor ka UCC?
