Shillong, Iaiong 16 : U MLA barim ka Mawlai bad Nongialam ka NPP Bah Embhahlang Syiemlieh, u la ujor da ka ejahar (FIR) pyrshah ïa ki briew kiba pynsaphriang ïa ki khubor thok pyrshah ïa u ha ki rynsan ‘Social Media’.
Ha kane ka ejahar kaba la ujor sha u Superintendent of Police (SP) ka East Khasi Hills ha ka 15 tarik mynta u bnai, u Bah Embhah u la tyrsad lang ruh ïa ki dur ki dar bad ki jingthoh kiba la pynsaphriang ha ki Facebook Page jong ka Tei La Tynrai bad “Ka Lympung Ki Khun Ka Ri”.
U Bah Embhah ha kane ka ejahar u la ong ba ka la don ka jingthmu ban pynthohbria bad pynjah burom ïa ka longrynïeng ka jong u, da ki jingthoh kiba pher bapher ha kitei ki ‘Facebook Page’ bad ym tang katta, ki la don ruh ki jingthoh ba la thep kiba la thmu ban pynsngewthuh bakla ïa kaei kaba u la kren.
Shuh shuh ha kane ka jingujor, u Bah Embhah u la ong, “Lah ban kdew hangne ba ki katto katne ki kynhun khwan myntoi lane ki riew shimet, ki la pynsngewthuh bakla ïa ka jingkren jong nga, ïa kaba nga khlem kren hi ruh bad ïa kine lah ban pynshisha ruh lyngba ki lad pathai khubor ha u Shillong Mail bad T7 News Channel kiba la mih.”
Une u MLA barim ka Mawlai u la kyrpad ïa ka tnat pulit ba kan leh ïa kaba donkam ban shimkhia bad ban pynshitom pyrshah ïa kito kiba pynsaphriang ïa ki khubor thok bad kiba pynshit.
“Dei ban pynshitom katkum ki kyndon jong ka aiñ pyrshah ïa kito kiba donkti ban pynphriang ïa ki khubor thok bad ki jingai jingtip kiba ïalam bakla ïa ki paidbah bad kaba ktah pat ïa ka longrynïeng ka jong nga, uba ju ai ka jingshakri kaba hok sha ki nongshong shnong ka jylla,” la ong u Bah Embhah.
 ka East Khasi Hills ha ka 15 tarik mynta u bnai, u Bah Embhah u la tyrsad lang ruh ïa ki dur ki dar bad ki jingthoh kiba la pynsaphriang ha ki Facebook Page jong ka Tei La Tynrai bad “Ka Lympung Ki Khun Ka Ri”.){kind=link}