Lap ba lum pisa be-ain na ki trok ba khaii mawshun na Bholaganj LCS
Shillong, Nailur 14: U Sub Divisional Magistrate ka Sohra Civil Sub Division Bah L Kynjing, ula mudui da ka ejahar pyrshah ia u Syiem ka Hima Sohra, u Syiem Khynnah ka Hima bad kawei ka kynhun ba ai kyrteng ialade ka Joint Action Committee, halor ka jingkynnoh lum pisa be-ain na ki trok mawshun kiba khaii mar sha Bangladesh lyngba ka Bholaganj Land Custom Station (LCS), kaba long pyrshah ia ka hukum jong ka Iingkashari Meghalaya High Court.
Ia kane ka ejahar la mudui hynne ka sngi Balang ha u Officer Incharge ka Shella Police Station haba kyntu ruh ban register case pyrshah ia kine ki Nongialam ka Hima bad ruh ia ka Joint Action Committee kaba la thaw ban pyndik ia ki nongkhaii bad lum pisa be-ain na ki trok.
Kat kum ka ejahar, une u Ophisar MCS ula pyntip ba ula ioh pdiang ia ka jingtip naka seng Hynniewtrep Achik National Movement (HANM)-South Khasi Hills ba ka don ka kynhun ba khot ialade ka Joint Action Committee, kaba treikam beain bad pyniaid khlem da ioh bor bad buh kyndon ia ka jingiaid jong ki trok kiba kit mar ban khaii lyngba ka Zero Point, Majai.
La kynnoh ba kane ka Kynhun kala buh ia ki briew ban ai slip ia ki kali ba kin ioh iaid khaii ha kiba bun ki jaka jong ka surok PWD bala pyndonkam da ki trok ban kit mar khaii sha Bangladesh lyngba ka Majai.
La kynnoh ruh ba kane ka Joint Action Committee kala pyndik bha ia ki Nongkhaii bad ka leh donbor da kaba jied hala ka mon ia ka kali kaba dei ban pyniaid bad ka bym shah iaid.
Une u Magistrate ula ong ba kane ka jingleh jong ka JAC kaba iasyriem thip kum ka jingleh jong ka Hima Sohra Core Committee (kaba la duh la dam) ka dei ka jingpynkhein ia ka kyndon 144 CrPC kaba la pynmih da ma u kum u Dub Divisional Magistrate ha ka hukum No.SSD/JDCL/LO/Pt.1/2/2015/Vol-I/73 ba 1 tarik Nailar 2022.
Haba pyntip ba ki briew ba thaw ia ka JAC ki dei ki juh ki briew ba iadon ha ka Hima Sohra Core Committee, une u Magistrate ula ong, ki kam jong ki ka paw ruh kum ka jingpynkhein ia ka hukum bala pynmih da ka iingkashari ha ka Point No. 9 (VII) of WP ( C ) No.144 of 2022 with WP ( C ) No.92 of 2022, WP ( C) No. 97 of 2022 bad WP ( C) No. 111 of 2022.
Une u Magistrate ula ong ruh, ha kajuh ka por la ujor ruh ba ka Hima Sohra bala khlieh da u Syiem ka Hima, u Syiem Khynnah bad u Bah BV Rymmai bad kiwei, kila pynkhein ia ka hukum ka Iingkashari High Court kat kum ka point No. (III) of WP (C) 144 of 2022 , (WP ( C) No. 92 of 2022, (WP ( C) No. 97 of 2022 bad WP( C) No 111 of 2022.
U Magistrate ula kdew ba ka jingpynkhein hukum jong kine ki Khlieh ka Hima Sohra ka long ba kila lum khajna na ki trok haduh T. 400 (T.200 ba rung bad T. 200 ba mih) ha ka jaka T. 200 kumba la bthah daka Iingkashari High Court ka Jylla ha ki hukum jong kine ki mukotduma kaba long na ka bynta ki kali kiba iaid na Umdud sha ka Bholaganj Land Custom Station (Zero Point).
