Guwahati, Nailur 21 :U nongjngi ba pawkhmat na Assam, u Elvis Ali Hazarika ula kylla long u nong Assam uba nyngkong eh u ban jngi lyngba ia ka duriaw North Channel.
Ka North Channel ka dei ka bynta jong ka khap duriaw hapdeng ka thain shatei mihngi ka Northern Ireland bad ka thain shathie sepngi ka Scotland.
“Nga la kylla long u nong Assam uba nyngkong eh u ban jngi lyngba ia ka North Channel ha ka Relay na Northern Ireland sha Scotland.Ngi la hap ban iaid lyngba shibun ki jingeh, khamtam namar na ki dohkha Jellyfish kiba heh kiba bud beit ia ngi ha baroh shilynter,” ong u Elvis Ali Hazarika hadien ba ula ioh ia kane ka jingjop.
Nalor kata u Elvis Ali Hazarika ula kylla long ruh u nong jngi uba la rangbah tam na India u ban lah ban jngi lyngba ia ka North Channel.
“Ngi dei ka kynhun Relay team kaba nyngkong eh napoh Asia ki ban jam lyngba ia ka North Channel, bad Nga dei u nongjngi uba la rangbah tam na India u ban jngi lyngba ia katei ka khap duriaw,” ong shuh shuh u Elvis Ali Hazarika.
U Elvis bad ka kynhun jong u kila lah ban jngi haduh 14 kynta 38 minit ban ioh ia kane ka jingjop. “Ka jingphohsniew kala wan urlong bad Nga sngew sarong na ka bynta baroh ki nong India bad ki nongshong shnong ka Assam,” ong u Elvis Ali Hazarika.
Hadien kane ka jingjop, na ka liang u Elvis Ali Hazarika ula pyllait ruh ia ki dur ki jong u ha ryngkat ka lama India nalor ka jain tynrai jong ki nong Assam (Gamosa) kaba thoh Joi Aai Axom.
