Sivasagar, Naiwieng 25 :Da kaba kynthoh pyrshah ia u Myntri Rangbah (CM) ka Assam u Himanta Biswa Sarma bad ia ka seng BJP, u MLA Akhil Gogoi hynnin ka sngi Palei ula ong ba ki kam politik jong ka BJP da kaba pyrto ia u Bir Lachit Borphukan kum u riewshlur jong ki Hindu ka long ka jinglehrain na ka bynta ki nongshong shnong ka Assam.
Haba aijingkren sha ki lad pathai khubor ha ka jingrakhe ia ka lyngkhuh sngi kha kaba 400 jong u Bir Lachit Borphukan ha Sivasagar, u Akhil Gogoi ula ong ba ka BJP ka dei ban sangeh ban pynkylla kam sain hima ha ka kyrteng jong u Lachit Borphukan.
“U Bir Lachit Borphukan u dei u riewshlur jong ki jaidbynriew Assamese ym jong ki Hindu. U Bir Lachit ula iakhun pyrshah ia ki Mughal, ula pynrem ia ki bad iada ia ka Assam.Kumta u Bir Lachit u dei u riewialeh bad u riewshlur jong ki Assamese. U Lachit um dei ruh u riewshlur jong ka ri India lane u riewialeh jong ki Hindu,” ong u Akhil Gogoi.
U Gogoi ula ong ba ka BJP kala pynkylla kam sain hima lyngba ka niam Hindu bad Muslim bad kala pynmih ia ka kyrteng jong u riewshlur hapdeng jong ki. “Kane ka long ka bym lah ban pdiang,” ong u Akhil.
Nalor kata u Akhil Gogoi ula ong ruh ba lada ia u Lachit Borphukan yn pyrto kum u riewshlur jong ki Hindu ne jong ka ri India, ki nongshong shnong ka Assam kin pynlong da ka jingiakhih.
Shuh shuh ula ong ruh ba ka sorkar BJP ha ka jaka ba kan pynphriang ia ka khubor ka jingkordor bad ka jingshlur jong u Lachit Borphukan kala pynlut pynban da ki klur ka pisa jong ki nongsiew khajna ban pynkylla long ia u, u riewshlur jong ki Hindu.
Ka jingrakhe ia katei ka lyngkhuh sngi kha jong utei u riewshlur ka Assam la pynlong hapoh Rang Ghar ha Sivasagar district ka Assam.
Shwa kane, na ka liang u Myntri Rangbahduh (PM) ka ri u Narendra Modi ula pynlong ka jingleh burom na ka bynta u Bir Lachit Borphukan ha kane ka lyngkhuh sngi kha ka jong u abd ong ba une u nongialam un kylla long ka nuksa halor ka jingpynpaw ia ka jingshlur ka jong u.
Na ka liang u Myntri kam pohiing ka sorkar pdeng u Amit Shah ruh ula iashim bynta ha kane ka jingrakhe ha ka jingialang kaba la long ha ka nongbah New Delhi.Ha kane ka sngi u Shah ula pyllait ruh ia ka documentary ha kaba iadei bad ka jinglong jingim jong u Lachit Borphukan.
Haba kren ha kane ka juh ka jingialang u CM ka Assam u Himanta Biswa Sarma ula kyntu ia ki nongshong shnong ka Assam ba kin pynlong ka jingthang sharak kum ka dak ka jingleh burom ia une u riewshlur.Ula ong ruh ba kane ka jingrakhe ia ka lyngkhuh sngi kha kaba 400 jong u Lachit kala pyniatylli ia ka imlang ka sahlang jong ki nongshong shnong kiba dei ki Assamese.
