Ahmedabad, Naiwieng 25: Watla ki jingkynthoh pyrshah da u Myntri Rangbah (CM) ka Assam pyrshah ia u nongialam ka seng Congress u Rahul Gandhi kam dei shuh kaba dang thymmai, hynrei la iohi ba kane ka jingkynthoh ka la nang jur shwa jong ka jingpynlong ia ka ilekshon assembly ha Gujarat.
Ha ka jingkynthoh kaba dang shen u CM ka Assam u Himanta Biswa Sarma ula pyniasyriem ia u Rahul Gandhi bad u President barim ka Iraq u Saddam Hussein.
Haba aijingkren ha ka rally jong ka BJP ha Ahmedabad ha ka sngi ba Ar ba la lah, u CM ka Assam ula ong ba une u nongialam jong ka Congress ula kham iasyriem abd u Saddam Hussein, kata haba pynpaw halor ka interview ba dangshen ka jong u lyngba ka tnat telebishon.
U CM Sarma ula ong; “Nga la pynpaw lyngba ka tnat telebishon ha kine ki khyndiat sngi ba la dep ba kam don kano kano ka jingthut ha kaba iadei bad ka jinglong ka dur ka dar bathymmai jong u Rahul Gandhi. Hynrei, lada phi donkam ban pynkylla ia ka dur ka jong phi, kumta ruh la kumno kumno pyrshang ban pyniasyriem bad u Vallabhbhai Patel lane u Jawaharlal Nehru.Kan bha ruh lada phi kham iasyriem ia u Gandhi, hynrei balei ba phin kham iasyriem pynban ia u Saddam Hussein mynta?”
Nalor kata u CM ka Assam ula kam ruh ba u Rahul Gandhi ula jah rngai hapoh Gujarat. Ula ong ba ula wan jngoh ia kane ka jylla la kumba u dei u professor uba dei wan jurip…um shym la ialap ilekshon ruh hapoh Himachal Pradesh.Ula leit pynban tang sha kito ki jaka ha kiba ym shym la pynlong ia ki ilekshon, kata lehse namar ka jingsngew syier na ka jingshah rem.
Haba pynphai kylla ia katei ka jingkynthoh jong u Sarma u heh ka Congress ka Assam u Bhupen Kumar Bora ula ong ba u Himanta Biswa Sarma u la shu kwah tang ban paw khubor haba ula pynmih ia katei ka jingkynthoh pyrshah ia u Rahul Gandhi.
Haba kren sha ki lad pathai khubor, u Bora ula ong; “U Himanta u lah ban ong kat kaba u mon.U lah ban leh kumno kumno ruh na ka bynta ka bor. Ngim shym ka pynsngap.”
U CM ka Assam ula bteng ia ki jingialap ilekshon hapoh Gujarat na ka bynta ka ilekshon ka ban long ha kaba sdang jong u bnai Nohprah u ban wan.
