Imphal, Naiwieng 25 :Ki bor shipai na ka kynhun Moreh battalion jong ka Assam Rifles kaba hap hapoh ka jingkhmih jong ka Headquarter Inspector General Assam Rifles (South) kila lah ban pynpulom ia ka jingthmu khaii drok beain lyngba ki jaka khappud da kaba pynap shrip hapoh ka shnong Phungchong, ha New Moreh ka Manipur.
Hadien ba la ioh ia ka jingtip kaba thikna ha kaba iadei bad ka jingdon jong ka kynhun ki nongkhaii drok, kumta ruh ki bor pahara kila pynlong ka jingpynap shrip lyngba ki kali hapoh shnong Phungchong ha New Moreh, Manipur ha kaba kila lapdien bad pynsangeh ia kawei ka kali auto rickshaw.
Hadien ka jingtalasi ia kane ka kali kila lapdien 5 tylli ki byrni kiba don ia ka jingkhia kaba 118 kilo ha kaba la thep ia ki suba Pseudoephedrine tablets kiba dei ki jingkhleh ba kongsan na ka bynta u drok methamphetamine.Ka dor jong 118 kilo u Pseudoephedrine ka long haduh 118 klur ha ki jaka iew jong ka pyrthei.Ia kine ki dawai ba la ioh kurup la aiti noh hapoh Moreh Police Station na ka bynta ban bteng shuh shuh ia ka jingtohkit.
