Golaghat, Naiwieng 25: Ka jingjia kaba la wanrah ka jingkyndit kala wan jia hapoh kawei ka jaka aijingsumar ha Old Amolapatti hapoh Golaghat district ka Assam hynnin ka sngi Palei, kata hadien ba phra ngut ki briew kiba la kyrni ha ki jingdih drok kiba wan shah sumar ha kane ka jaka kila phet krad noh na kane ka jaka.
Phra napdeng ki 25 ngut ki samla kiba shah sumar ha kane ka jaka kaba la tip kum ka ‘Blessing Care Foundation,’ kila phet krad noh na kane ka jaka sumar da kaba pynkdiah ia ki grill jong ka skylight ne ventilator.
La iathuh ruh hadien ba uwei na ki nongai jingsumar ha kane ka jaka ula pyrshang ban pynsangeh ia ki, kine ki samla kila thombor ia u bad phet krad noh na kane ka jaka.
Ia kine ki briew kiba la phet krad noh la tip kyrteng kum u Ankur Gogoi, Samiran Shaym, Vinod Thakur, Vikash Basfar, Partha Pegu, Champak Bora, Hemant Mech bad u Amrit Chetri.
Baroh kine kiba la phet krad ki dei napoh Golaghat bad Jorhat district, ong ki bor ba dei khmih jong katei ka jaka sumar.
Kine ki khynnah samla la suba jur ba kila phet krad noh na katei ka jaka namar ka jingjur palat ka jingkyrni ha ka jingdih drok.Ha kawei pat ka liang, na ka liang ki bor ba dei khmih kila dep lypa ban pyntip ia kane ka jingjia sha ki bor pulit bad ka jingtohkit mynta ka dang iaid shakhmat.
Kham hashwa, kata ha u bnai Naiwieng ba la dep, shibun bah u u Opium la ioh ban kurup da ka tnat iakhun pyrshah drok na ki bynta jong ka Rangajan hapoh Golaghat.Na ka liang ka tnat NCB kala kem noh ruh ia laingut ki nongkhaii.Kine kiba la shah kem ki dei kiba la tip kyrteng kum u Gurdeep Mann, Babu Singh bad u Balraj Singh, katba sawngut kiwei pat ki dang jah rngai.
Ka kali Swift VXI kaba don ia u nombor AS01-AD-8182 ba la pyndonkam da kitei ki nongkhaii drok ka dang don ha ka lynti ban leit sha Numaligarh na Khatkhati kaba hapoh Karbi Anglong district hadien ba ka kynhun na ka tnat Narcotics Control Bureau na Guwahati kala khanglad bad pynlong ka jingtalasi.
Ha kane ka jingtalasi, kane ka kynhun kila ioh ban kurup shi kilo u opium ba la buhrieh hapoh ka seat jong ka kali.
