Shillong, Lber 25 : U MLA ka seng UDP u Bah Olan Sing Suin ula kyntu ia ka sorkar ba kan shimkhia mardor halor ka jingwan pynjulor jong ki hati ha ka thaiñ jong ka Mawsynram constituency, ha kaba ka kynhun ki hati khlaw kala pynjulor ia ki jingthung, jingtep bad ia ki iing ki sem.
Haba iakren bad ki nongpathai khubor ha ka sngi Baar, u Bah Suin ula ong, “Kala don ka jingwan pynjulor jong ka kynhun ki hati khlaw ha ka constituency jong nga, kane ka kynhun ki hati kala pynjulor ia ki jingthung jingtep bad ia ki katto katne tylli ki iing. Nga lah pyntip ia kane ka mat sha ki bor kiba dei khmih bad la rah ruh ha ka iingdorbar thawain ka jylla. Nga lah leit ruh ban iakynduh ia u Principal Chief Conservator of Forests mynta ka taiew ban pynbor ban leh eiei ban beh ia kine ki hati na katei ka jaka”.
U Bah Suin ula pynpaw ia ka jingsngewkhia ia ka jingshah ktah ki nongrep da kaba ong, “Ka jingdon kine ki hati kala pynsheptieng ia ki paitbah ban leit rep kba bad ka jingsyier ba ki jingthung kin shah pynjulor lut. Ka jinglong jingman kala nang heh bad ngi donkam ban leh eiei noh mardor ban tehlakam ia kane ka jingma kaba la leh da kine ki hati khlaw”.
U Bah Suin, ula ong ba kine ki hati kila wan rung sha kane ka thain lyngba ka Ranikor bad lehse kila wan lyngba ka Balpakram, ia kaba ki lah ban leit phai biang na ka jaka kaba ki wan hynrei kila wanphai biang.
“Nga lah iakren bad ka tnad Wildlife bad ki dang trei ia ka kam ban wad ia ki lad ki lynti. Ngin sa nang khmih bniah ia ka rukom iaid shakhamt jong ka kam ha kine ki sngi ban wan” ula ong.
Ha kane ka jingwan kine ki kynhun ki hati, ym shim la don kano kano ka jingmynsaw ne jingjia kaba sngewsih ia kino kino ki briew, hynrei kala don tang ka jingjulor kaba malu mala ia ki jingdon jingem.
“Kane ka kynhun ka kynthup ia ki 5 tylli ki hati bad kam shim la don kano kano ka jingmynsaw ia kino kino ki briew, hynrei tang ka jingshah pynjulor kaba malu
mala ia ki iing bad ki jingthung jingtep” ong u Bah Suin.
Haba kylli la ka don kano kano ka lad ban pynbna ia katei ka jaka kum ka lynti iaid jong ki hati, u Bah Suin ula ong, ba u dang shimkhia ia kane ka mat bad ka sorkar jylla.
“Nga dang ialeh ban pynrung ia ka constituency jong nga ban shah kynthup lang hapoh jong ka Elephant Project. Katba ka jingiakren kadei kaba dang iaid shakhmat, kumta ka jingmih kadei kaba ym pat lah ban batai eiei bad ngi ngin khmih bniah ha baroh ki liang” ula ong.
U Bah Suin ula banjur ba kane kadei ka jingjia kaba ha ka sien kaba nyngkong eh ha ka constituency jong u hadien bun phew snem.
“Kane kadei ka sien kaba nyngkong ba ki hati kila wan rung ha ka constituency ha u snem ba la dep. Nga dang trei ryngkat bad ki bor kiba dei khmih ban wad ia ki lad ki lynti ban weng shi syndon ia kane ka jingeh” ula pynkut.
