Khot u Amit Shah ia ki Nongialam Niam sha Delhi
Shillong, K’lyngkot 18: Ka Bharatiya Janata Party (BJP)-Meghalaya, kala tynruh ia u Myntri kam Pohiing ka Ri Amit Shah halor ki jingdawa ka Jylla ban pyntreikam noh ia ka Inner Line Permit (ILP) bad ban pynrung ia ka ktien Khasi bad Garo ha ka khyrnit ba phra jong ka Riti Synshar ka Ri.
Ka kynhun ki Nongialam ka BJPba lamkhmat da u President Rikman Momin bad u Myntri Sorkar A.L.Hek, kala pynsngew ia kane ka jingdawa ka Jylla hakhmat u Amit Shah, uba don mynta ha Nongbah Shillong.
U Amit Shah ula wan poi ha Shillong bad plie ia ka Cyber Security Operations Centre ha HQ Assam Rifles kaba don ha Laitkor. U Myntri un pyniaid ruh ia ka plenary meeting jong ka North Eastern Council (NEC) lashai ka sngi Thohdieng.
U Nongaiktien ka BJP Bah M Kharkrang u pyntip ba ki nongialam ka BJP kila iakren bad u Myntri kam Pohiing ka Ri halor ki Resolution bala mynjur da ka Iingdorbar Thaw Ain ka Jylla – ka jingdawa ILP bad ban ai jingithuh noh ia ka ktien Khasi bad Garo.
U pyntip ba ka jingiakren kala mih ruh halor ka jingplie ia ki jaka khaii sha Bangladesh lyngba ka Jylla Meghalaya.
“U Myntri kam pohiing ula sngap bha ia kine ki jingpynsngew bad ula mynjur ban sa khmih ia baroh” ong u Bah Kharkrang.
Une u Nongialam ka BJP-Meghalaya u pyntip ba u Amit Shah ula khot sngewbha ruh ia ki Nongialam Niam ban wan sha ka jingialang ha Delhi ha ryngkat u President ka BJP-Meghalaya bad u Myntri Sorkar Bah AL.Hek, ban iakren ia ki kam ba iadei bad ka Foreign Contribution Regulatory Act kaba ktah ia ki Kristan bad ka jingai jaka ha Delhi sha ka KJP Synod.
