Shillong, K’lyngkot 18 : U Myntri kam Pohiing bad Cooperation Amit Shah ha ka sngi Palei, ula plie ia ka Cyber Security Operation Centre ha HQ ka Assam Riles, Laitkor, Shillong ha ka jingiadon lang u Lt Gen PC Nair, Director General ka Assam Rifles.
Ka Cyber Security Operations Centre kan pynkhlain ia ka jingshngain na ki kam bymman lyngba ki kor internet ne Cyber da kaba peit pyrman khlem sangeh ia ka network, ka jingwan ki jingma ba nabar bad jingtehlakam ia ki kam bymman hapoh ka Assam Rifles Wide Area Network (ARWAN).
Kaneka Centre ka dei kaba nyngkong eh hapdeng ki CAPF. Ka jingjur ka jinghiar thma cyber ha kane ka juk ka mynta kala pynlong kongsan ban iada ia ka network na ki nongshun, ki nongtuh network bad kiwei kiwei.
U Myntri ula ai ka jingiaroh ia ka jingshimkhia jong ka Assam Rifles ban pynthikna ia ka jingshngain jong ka kam shakri digital hapoh Assam Rifles.
