Kaziranga, Risaw 10 :Kawei ka trok kaba la pynher sted bha kala ioh tynrah ia uwei u rhino hapoh Kaziranga national park ha ka lynti surok national highway 37 ha Assam.
Une u rhino ula shah tynrah ha kane ka trok kaba la pynher sted bha katba u dang mih kynsan ha kane ka surok highway.
Hadien kane ka jingshah tynrai, une u rhino um lait na ka jingiap bad phet biang shapoh khlaw.
Haba pynpaw halor kane ka jingjia, na ka liang u Myntri rangbah (CM) ka Assam, u Himanta Biswa Sarma ula ong ba na ka liang ka sorkar jong u kan khnglad ia kino kino ki jingpynthut ha kaba iadei bad ki lynti iaid ki jong ki.
“Ki Rhino ki dei ki paralok ba kyrpang jong ngi, ngin ym shah ba kan don kano kano ka jingpynthut ha ki lynti iaid ki jong ki,” ong u CM ka Assam u Himanta Biswa Sarma.
Katei ka jingjia kala jia ha ki bynta jong ka Haldibariin, Assam ka jaka ha kaba la maham ia ki kali ba kim dei ban pynher sted palat ia ka 40 kmph.
Hynrei, ha ka jingtohkit bniah la shem ba katei ka trok kala iaid ha ka jingsted kaba 50kmph, ong ki heh ka tnat forest ka Assam.
Hadien na ka liang ki bor sorkar kila lapdien ia kane ka trok ha kaba kila dain kuna ruh ia u nongniah jong ka.
Na ka liang u CM ka Assam ula ong : “Ha kane ka jingjia kaba sngew bynniaw shibun ha Haldibari une u Rhino ula lait im; la lapdien ia ka kali bad la dain kuna ia u nongniah.”
Shuh shuh na ka liang u Sarma ula ong ba na ka liang ka sorkar Assam kala pynkhreh na ka bynta ban shna da ki lynti iaid pyniasoh kiba kyrpang ha Kaziranga.
“Ha kawei pat ka liang ha ka jingpyrshang ka jong ngi ban iada ia ki mrad kiba don ha Kaziranga ngi ka pynkhreh ban shna ia ka lynti pyniasoh ba kyrpang kaba 32 km,” ong u CM ka Assam.
Ia kane ka surok pyniasoh yn dei na Jakhalabandha sha Bokakhat ha Assam na ka bynta ban iada ia ki mrad khlaw hapoh Kaziranga national park.
