Shillong Naitung 03: Ka surok kaba kongsan ha Baghmara kaba dei ruh tang kane hi ka surok ban leit sha Siju, Rongara bad Nangalbira kala twa na ka jingther u lapbah lapsan ha ka miet jong ka sngi Baar.
Baroh kawei ka surok kaba don halor jong ka Baghmara Municipal Board kala twa ha ka por mynmiet na ka jingther u lapbah lapsan bad kane ka jingtwa kala pyndkoh ia ka leit ka wan jong ki paidbah ban leit sha East Garo Hills bad sha South West Khasi Hills, lyngba ka thaiñ Rongara.
Ki kali kin ym lah ruh ban leit sha ka ophis jong u Deputy Commissioner lyngba ka shnong Baghmara hadien ba ka bynta jong katei ka surok kala twa noh.
Ki trai shnong kila ong, ba katei ka jingtwa kadei namar ba ym shim don kiba la khmih ne peit ia ka jinglong jingman jong katei ka surok bad khamtam haba ym shim la shna ia kino kino ki kynroh bad ka jingmih jong ki jingtei ha ki bynta jong katei ka surok kadei ruh shi bynta ban nang pynjur ia katei ka jingjulor.
Ka Garo Hills kala iai mad ia ka jingbteng ban slap jur bha ha kine ki shi taiew kiba la dep ha kaba kala lam sha ka jingtwa khyndew, ka jingshah pynjulor ki iing bad ka jingshlei um.
Hadien jong katei ka jingtwa ka surok ha Baghmara, ki nongleit nongwan kila hap ban pynieng noh ia ki kali ki jongki ha ka bynta jongka thain ba wan na Siju bad kila hap ban iaid noh da ka kjat lyngba ka lad ha Baghmara Circuit House ban mih lyngba sha ka New Bazar kaba don ka ophis treikam jong ka Municipal Board.
