Khlad 2 ngut ki nongtih dewïong ka Meghalaya ha Tinsukia

Guwahati, Jylliew 03: Arngut ki nongtih dewiong kiba na Meghalaya kila khlad noh hapoh ka Tinsukia District jong ka jylla Assam na ka jingsuba jur ba kila ring mynsiem ia ka lyer bih (Gas Poisoning). Kane ka jingjia, kala wan jia hadien shi bnai tam ha kaba kala don ka jingjia ha katei kajuh hi ka jaka, ha kaba 3 ngut ki nongtih dewiong kila khlad noh kiba kynthup ia ki ar ngut kiba na ka jylla Meghalaya.

Katkum ki khubor kiba la iohlum na ki trai shnong, kila pynpaw ba ia kitei ki arngut ki nongtih dewiong la lap ba kila thiah lyngktar ha ka thaiñ Dharna Basti jongka Lidu Pahar ha Tinsukia ha ka janmiet jong ka 1 tarik u Naitung. Kumta la pynkit noh ia ki sha Margherita FRU ban ioh ia ka jingsumar, hynrei ki doctor kila pynbna ba kila dep ban khlad noh shwa ban poi ha ka jaka sumar.

Ia kitei ki metiap la aiti noh sha ki pulit jongka Margherita Police Station.

Kila kynnoh ruh ba baroh arngut kitei ki nongbylla kidei kiba donkti ha kaban tih dewiong thliew khnai hapoh Ledo ia kaba la pyniaid da uwei u nongkhaii na katei ka thaiñ hi.

Wat hapdeng ka jingkhang pyrshah ka National Green Tribunal (NGT) bad ka jingbuh ki bor sorkar ia ki kyndon kiba pyrkhing bha hynrei ka jingtih dewiong thliew khnai kala iai bteng ha katei ka thaiñ.

Ha ka 21 tarik u Jylliew, ka kynhun jong ki 7 ngut ki dkhot jong ka ïingdorbar thawaiñ ka Assam kila leit ban jurip ia katei jingkhaii be-aiñ ia u dewiong bad ka jingtih dewiong thliew khnai hapoh Tinsukia.

Kum ban shu pynkynmaw ha ka 25 tarik u Jymmang kala don ka jingtwa khyndew ba kawei ka krem tih dewiong kaba hapdeng jongka Bargolai bad Namdang kiba don ha Patkai Hills, hajan khappud bad ka jylla Arunachal Pradesh kaba don ha Tinsukia. Arngut ki nongbylla Khasi kiba na Ri-Bhoi District, kiba kynthup ia u John Nongrum na Jatah bad u Phiniellin Umbah na Korhadem kila khlad noh ha katei ka jingjia.