Shillong, Naitung 02 : Ki Pulit ka North Garo Hills, kila iohkem ia lai ngut ki runar napdeng ki 4 ngut, kiba lute naphang ia ki briew ba iaid ba ieng da kaba pynap pistol hapoh ka ka thain Mendipathar.
U Superintendent of Police Pawar Swapnil Vasantrao ha ka sngi Ba-ar, u pyntip ba ki Pulit kila ioh pdiang ia ka ejahar ha Mendipathar Police Station ba 4 ngut ki runar, kiba wan da ka scooty Aprilia AS18-J-0181 bad ka Bajaj Pulsar 220 AS-18E-7925, kila kah lynti ia ki briew nongiaid nongieng da kaba pynap pistol bad lute naphang ia ka pisa.
U pyntip ba kine ki runar kila ioh lute haduh T.80,000 bad rong tuh ruh ia ki kot ki slab a donkam lem bad artylli ki mobile phone.
Une u Heh Pulit u pyntip ba ki nongshongshnong ka Beldonpara kila ioh bat ia ka thuk thuk ha Shnong hynrei u nongniah bad u nongbud, kila iohlad ban phetkrad.
Ki Pulit bala ialam da u DYSP, Special Ops bad ka Kynhun ki Pulit ka District, kila pynlong ia ka jingkhynra ha ki thain Assam bad ha ka 24 tarik Jylliew, kila iohkem ia u Nongniah ka scooty ba kyrteng u Sunil Boro ba na Goalpara bad ioh kurup ruh ia ka scooty.
U pyntip ba une u runar ula phla ia ka jingdonkti ki laingut kiwei pat kiba kyrteng u Kaltu Rabha, Turti Basumatary bad u Sahadev Basumatary, kiba dei na ka thain Dudhnoi, Assam.
Ki Pulit kila pynlong ia ka jingthwet ia kine ki runar bad ha ka 1 tarik Naitung, kila iohkem sa ia u Turti Basumatary hadien ba ula wan ban pyndem hi dalade hakhmat ki Pulit ka NGH lem bad kawei ka pistol kaba don artylli ki kuli. Da ka jingialam lynti une u runar, ki Pulit kila iohkem sa ia u Sahadev Basumatary na Tikrikilla, West Garo Hills.
U pyntip ba ka jingkhynra mynta ka dang iaid shakhmat ban iohkem sa ia u Kaltu Rabha ba donkti ha kane ka kam bymman.
