Guwahati, Jylliew 16 :Ki nongkyrshan ka seng Congress ha Assam hynne ka sngi ki la tur paidbah sha Raj Bhawan ha Guwahati ban pynpaw pyrshah halor ka jingshah khot hajir u heh nongialam jong ka Seng u Rahul Gandhi ha ka tnat Enforcement Directorate (ED).
Hynne ka sngi da ki spah ngut ki nongtrei ka seng congress ki la ialum lang shabar jong ka Raj Bhawan wat hadien ka jingther jong u ‘lapbah hashwa ba kin sa shah rah noh ha ki pulit.
Katba hynnin ka sngi ha ka nongbah Guwahati, ki pulit ki la kem noh ia u president ka Assam Congress u Bhupen Kumar Borah lem bad ia kiwei pat ki nongialam bad ki nongtrei jong ka party hadien ba ki la pynlong ia ka jingiakhih halor katei ka jingkhot hajir jong ka tnat ED pyrshah ia u Rahul Gandhi.
Ha kane ka jingjia ka la mih ka jingialeh markylliang hapdeng ki nongkyrshan ka Congress bad ki bor pulit ka ba la wanrah ruh ka jingmynsaw ia uwei u heh pulit. Kham hadien la rejistar case pyrshah ia kito ki nongtrei ka congress namar ka jingdonkti ha ka ba thombor ia u heh pulit u ba don hapdeng ka kam, ong u heh pulit lyngba ka lad pathai khubor.
Ki nongtrei bad ki nongkyrshan jong ka seng Congress ki la pynlong ia ki jingiakhih ha baroh ki bynta jong ka thain shatei lammihngi jong ka ri (NE) ban pynpaw pyrshah halor ka jingshah khot hajir u heh nongialam jong ka party u Rahul Gandhi ha ka tnat ED ha kane ka sngi Balang ba la lah.
