Shillong Naitung 12: Ki pulit ka East Khasi Hills ki la pynmih da ka All-India Lookout Notice bad thaw ruh da ka kynhun ban wad ia u runar ba kynnoh leh beijot ha ka case bala register ha Laitumkhrah PS.
U Superintendent of Polic (SP) Bah Vivek Syiem u la ong ba ki Pulit ka Jylla kila sdang iaka jingiatreilang bad ki Pulit ka Jylla Mizoram nalor bad kiwei pat ki jylla.
“Ha kaba iadei bad ka kam leh beijot kaba la register case ha Laitumkhrah PS, ha ka jingshisha ngi la phah ia ka Lookout Notice sha Mizoram bad mynta ngi la pynmih ruh sa ka All-India Lookout Notice. La thaw ruh da ka kynhun ban wad ia uba shah kynnoh ha kane ka kam” la ong u Bah Vivek.
U Bah Vivek ula ong ba ki Pulit kila dep ban shim jingthoh ia ka jingbatai jong ka lanot bad la suba ruh ba don sa kiwei pat ki lanot.
“Ngi la shim jingthoh ia ka jingbatai jong ka lanot. Ngi la tip ruh ba ki don kiwei pat ki nongshah thombor. Ngin hap tohkit ruh ia ki ha ka por ban wan” ula ong.
U Bah Vivek u la bynrap ruh ba la ioh ban iakren ia kiwei ki lanot lyngba ka Phone bad la bthah iaki ban wan ujor daka ejahar.
“Ngi la iakren bad katto katne ngut ki nongshah thombor hynrei ka dei tang lyngba ka phone. Mynta ngi la phone ia ki ban wan khnang ban ioh shim jingthoh ia ki jingbatai jong ki halor ki jingjia bad haka juh ka por ngi la kyntu iaki ban ujor daka ejahar” u la ong.
Ki pulit ki dang pynshisha ruh ïa ki jingkynnoh kiba la saphriang ha ki rynsan social media.
“Ki jingthoh ha ki rynsan social media kim dei ki jingshisha. Ngim pat lah ban pynthikna ia ka jingshisha jong kata. Tang hadien ba ngi la bishar bniah ia ki briew bad shim iaka statement ngin sa lah ban pynthikna lada ki dei ki nongshah thombor ne em” la ong u SP.
U SP ula iathuh ruh ba la talasi ia ka iing jong u nongshah kynnoh ha Aizawl hynrei ym shym la lapdien ia u.
“U khlem leit sha Aizawl. Nga la iakren bad u SP Aizawl. Ki la talasi ia ka jaka sah jong u hynrei um shym la lap satia ia u” ula ong.
U Bah Vivek ula ong ba yn sa lah ban chargesheet ynda la ioh ban kem ia u nongshah kynnoh.
