Shillong, Naitung 13 : U Superintendent of Police ka East Khasi Hills Bah Vivek Syiem ha ka sngi Nyngkong, ula ong ba ka jingai jamin ia ka Sonam Raghuvanshi, ka nongshah kynnoh ba hakhmat eh ha ka jingpyniap ia la u kurim Raja Raghuvanshi, la pynksan da ka High Court bad Supreme Court namar ka jingbakla thoh ha ki kot ki sla ba kem ia ka, bala pynkhreh ha Gazipur.
“Ha katei ka sngi, kine ki briew kila bakla thoh ha ka por ba ki pynkhreh ia ka arrest memo. La pynkhreh ia lai tylli ki kot, bad ha ka jaka 103 kila buh 403. Kam don satia ka kyndon 403 ha ka BNSS bad kane ka dei ka jinbakla thoh kaba lam sha ka jingioh jamin ka Sonam” ong u Bah Vivek.
U iathuh bala phah ia bun ki kynhun sha MP, UP bad Gazipur ha ka por ba kem ia ka.
“Arngut ki Ophisar kila hiar nangne bad bun ki kynhun kila leit nangne sha kylleng ki jaka” ula ong haba pynthikna ba ka Sonam kala lait na ka jamin bad ka dang wan sha ki jingbishar ka Iingkashari.
“Hooid, kala burom ia ki kyndon jong ka jamin. Ka don hangne ba kala leit mih ha man ki jingbishar kaba la khot da ka Iingkashari” ula ong.
Haba shim kum ka jingduna, u SP ula bynrap ba ka jingbishar hi kan dang iaid shakhmat. “Ka jingbishar kan dang iaid bad kane ka dei ka jingktah ia ka jingtohkit, hynrei ngim pat shah rem ia ka thma. To ngin khmih shakhmat sha ka jingtian bishar” ula ong.
U iathuh ruh ba ia ki kot ki sla bala pan da ka Supreme Court la dep ban phah sha u Advocate General.
