Agartala, Rymphang 28 :Wat hadien ba ka tarik ban pynbna ia ki nongjop ha ka ilekshon ka la hajan, hynrei ki kam iaumsnam kim pat shym la sangeh ha Tripura, kata hadien ba hynriew ngut ki briew ki la ngat ha ka jingshah thombor ha ki runar ia kaba la kynnoh ba ki dei kiba la kyrshan da ka seng BJP ha Khowai district ka jylla.
Ki tyllong khubor ki iathuh ba ha ka miet jong ka 27 tarik mynta u bnai, hapoh ka jingialam jong u nongialam shnong jong ka Khowai Madhya Ganki kaba hap hapoh Khowai district ka kynhun ki runar kila leh ia katei ka kam thombor.
Ha Khowai Tablabari Tantipara la ong ba kito ki bym shym la vote ia ka BJP la kynnoh ba ki runar kiba la kyrshan da kane ka seng hapoh ka jingialam jong u nongialam shnong ki la thombor ia ki dkhot jong ki longiing kiba kyrshan ia ka CPI(M).Ha kane ka jingjia hynriew ngut ki briew kaba kynthup ia kawei ka longkmie ki la ngat ha ka jingmynsaw jur.
Ia kine kiba la mynsaw la tip kyrteng kum u Sadhan Tanti, Kamal Tanti, Sumati Tanti, Rupali Naik, Anima Tanti bad u Shyamal Tanti.
Ki khubor ki iathuh ba hynnin ka sngi Nyngkong ha ka por kumba 10 baje mynmiet, ka kynhun jong kumba 30 haduh 35 ngut ki briew lyngba ka hukum jong ka BJP ki la thombor pyrshah ia ki nongkyrshan jong ka seng CPIM.Kine ki runar la ong ba ki la thombor ruh ia ki iing ki sem jong ki da kaba mait da ki wait, ki dieng, ki nar rod bad kiwei pat ki tiar pynjulor.
Watla na ka liang kiba haiing hasem jong kine ki lanot ki la leit ban ujor sha ki bor pulit hynrei kam shym la don kano kano ka jingpynshitom pyrshah ia kitei ki briew.Ki runar kiba kynthup ia u Amit Debnath, Asha Shuklo Das bad u Ajit Debnath ki dei kiba la pynkhreh ha kaba iadei bad kane ka kam thombor.
Nalor kata ki la maham ruh ba kin sa peit sa ha ka 2 tarik u Lber 2023.Kine ki runar kila khanglad ruh ia kine kiba la mynsaw ban pynkit shapoh ka hospital.Hynrei, kham hadien na ka liang ki nongshong shnong kila wan ban pynkit noh ia ki shapoh hospital.
Kiba haiing hasem jong kine ki lanot ki la ong ba ia ka case la ujor pyrshah ia ki briew kiba donkti hapoh ka police station ha ka thain.
