Sonitpur, Rymphang 28 : Uwei u rangbah u la shah kyrdem iap ha u hati khlaw ha ki bynta jong ka Balipara hapoh Sonitpur district ka Assam mynta ka sngi 28 tarik.Kane ka jingjia ka la jia hajan kawei ka karkhana pynmih kynphad ha ka shnong Chariduar hapoh Balipara, bad ia une u briew la tip kyrteng kum u Debeswar Mech.
Katkum ki khubor la iathuh ba kane ka jingjia kaba sngewtriem ka la wan jia hadien ba une u lanot u dang pyrshang ban bsa kait ia une u hati.
Ha kawei pat ka jingjia, uwei u rangbah 32 snem rta u ba dei na Dhing hapoh Nagaon u la shah pyniap noh ha uwei u hati khlaw uba la iakhlad noh na la ka jong ka kynhun.
Kane ka jingjia ka la jia ha ki bynta jong ka Khatangpani hajan Tarani reserve forest kaba hap hapoh Doomdooma forest division jong ka Tinsukia district ha ka thain shatei ka Assam.
Nalor kane ha kawei pat ka jingjia, uwei u shipai la kynnoh ba u la shah pyniap hadien ba ka kynhun ki hati khlaw ki la thombor ia u hapoh ka jaka shong jong ki shipai ha Guwahati.Ia une u shipai la tip kyrteng kum u Khamliyong Khap uba dei napoh Dimapur.
Ka tyllong khubor sorkar ka la pynthikna ba kane ka jingjia ka la jia ha ka janmiet jong ka 10 tarik mynta u bnai hapoh Narengi cantonment jong ki shipai Indian Army ha Guwahati.
