Agartala, K’lyngkot 19: Ka jingdawa kaba la slem bha ban ithuh paidbah ïa ki dak thoh Roman na ka bynta ka ktien Kokborok ka la mih biang ha ka jingrakhe ïa ka 48th Kokborok Day ha Agartala ha ka sngi Nyngkong, ha kaba ki kynhun samla pule trai ri trai muluk ki la pynlong ïa ki jingïakhih kiba la pynthut shipor ïa ka cultural programme bad wanrah biang ïa katei ka mat sha ka jylli sain pyrthei hashwa jong ka Tripura Tribal Areas Autonomous District Council (TTAADC) elections.
Da ki spah ngut ki samla pule—baroh ar na kiba dei riewlum bad ki bym dei ki riewlum—ki la ïashim bynta ha ka jingïaid paidbah na ka thaiñ Rabindra Satabarshiki Bhavan ban rakhe ïa ka sngi Kokborok.
Hynrei kane ka jingïalang ka la kylla sha ka saiñ hima sima namar ki nongïakhih jong ka seng Twipra Students’ Federation (TSF) bad ka Tribal Indigenous Students’ Federation (TISF) kila ïa snoh kti lang ha kane ka jingïaid paidbah, da kaba pyrta ïa ki slogan bad pyni ruh ïa ki jingthoh ban dawa ïa ka jingithuh ïa ki dak Roman ryngkat bad ki dak Bengali.
Ki pulit ha kaba sdang ki la pyrshang ban khanglad ïa ki nongiakhih, hynrei ki nongïakhih ki la bteng ban ïaid paidbah.Hajan ka Congress Bhavan, ki bor pahara kila wan biang bad kham bun kidei na West Agartala Police Station ki la ker kut ïa katei ka kynhun katba ki jingpyrta shla ka la nang jur. Wat hapdeng ki jingkhang, ka jingïalang ka la bteng, ha kaba katto katne ngut ki nongïa shim bynta ki la ïa khlad noh ban ïadon bynta lang ha ka jingïakhih kum ka jingïatylli.
Haba ïakren bad ki lad pathai khubor, ki nongïalam ki la ong ba kim pyrshah ïa ka dak Bengali, kaba la don lypa ïa ka kyrdan sorkar ne ka official status na ka bynta ka Kokborok, hynrei ki dawa ïa ka jingithuh kaba ïaryngkat ïa ki dak Roman, da kaba batai ïa ka kum ka jingdawa kaba la san phew snem na ka bynta kiba kren ïa ka ktien Kokborok.
Ka jingïakhih ka la pynmih ïa ki jingkynthoh kiba jur ha ka sain pyrthei.U Myntri sorkar barim uba dei ruh u MLA ka BJP, u Rampada Jamatia, uba la ïashim bynta ha katei ka jingïaid paidbah ryngkat bad u MLA barim ka BJP, u Dr Atul Debbarma, ki la kynnoh ba ka jingdawa ïa ki dak thoh Roman, ka dei shi bynta jong ka “jingthaw buit jong ki nongwei” ne ka “foreign conspiracy” bad kam ruh kadei kaba la slem bha, bad yn sa pynbeit noh shen, lyngba ka jingwanrah ïa ka dak thoh tynrai, kaba thymmai na ka bynta u Kokborok.
Kham mynshwa, u Myntri Rangbah ka jylla u Manik Saha u la kyntait ïa ka jingshim ïa kino kino ki dak thoh nabar na ka bynta ka ktien Kokborok bad u la kyntu ïa ki riew shemphang kiba kren ïa ka ktien Kokborok ban thaw ïa ka rukom thoh tynrai.Ka jingkren jong u ka la pynmih ïa ka jingpyrshah na ka TIPRA Motha, ba paralok ba kongsan jong ka BJP, kaba la pynpaw ïa ki jingsngew ïapher kaba la nangroi hapoh ka kynhun synshar.
La ju rakhe man la u snem kum ka dak ban ithuh ïa ka ktien Kokborok kum ka official language 48 snem mynshwa, ka Kokborok Day la ju pynleit jingmut ha ka jingpynpaw ïa ka kolshor.Hynrei mynta u snem, kane ka jingïalang ka la pynpaw biang sa shisien kumno kane ka mat ka dang ïadei bha bad ka jinglong trai ri trai muluk bad ka sain pyrthei elekshon ha ka jylla.
Da ka jingkhmih lynti ïa ka elekshon TTAADC hapoh ki ar bnai ban wan bad ki jingïakynad kiba paw hapdeng ka BJP bad ka TIPRA Motha,ka jingïakren shaphang ki dak Kokborok—khamtam eh ka jingdawa ban ithuh ïa ki dak Roman—la khmih lynti ba kan mih kum kawei na ki mat kaba pynsngewsih bad kaba rai ha ki elekshon ban wan.
 elections.){kind=link}