Agartala, Iaiong 22: U slap uba jur ha ryngkat bad ka eriong, ki la lynshop ha ki katto katne ki bynta jong ka Tripura ha ka sngi Nyngkong, ha kaba ki la pynjulor haduh 445 tylli ki iing bad arngut ki briew ki la mynsaw hadien ba ka tnum iing ka la hap bad ban halor jong ki.
Ha kane ka jingwan ban lyngshop jong ka eriong kala rat ruh ia ki dieng haduh ba kin da khyllem bad leit ban ngat ha kiba bun ki nar post electric bad kane kala pynthut ia ka jingsam bording ha kiba bun ki jaka.
Katkum ka jingkhein jong ka State Emergency Operation Centre, ki jaka kiba la shah ktah jur eh ka dei ha Mohanpur Sub-division kaba don ha West Tripura district, ha kaba 261 tylli ki iing ki la shah pynjulor—65 tylli kiba la julor bun bad 196 tylli kiba la shah pynjulor malum mala.
Ka Karbook ha Gomati district ruh ka la mad ïa kajuh ka jingshah pynjulor kaba jur ha kaba 158 tylli ki ïing ki la shah ktah jur, kynthup ia 26 tylli ki iing ki la pra hi phom katba 83 tylli kila julor bun bad 49 tylli kila julor malum mala.
Kiwei pat ki thaiñ kiba la shah ktah ki kynthup ia ka Sonamura Sub-division ha Sepahijala district ha kaba 7 tylli ki ïing ki la julor, Jirania ha West Tripura ki don 3 tylli ki ïing ki la julor malum mala bad ka Teliamura ha Khowai district ki don 16 tylli ki ïing ki la julor.
Ha Karbook la iathuh ruh ba ki don 14 tylli ki dieng kiba la shah pynkhyllem bad 22 tylli ki nar post electric kiba la shah pynjulor. Ha Udaipur Sub-division, ki don10 tylli ki dieng ki la shah jynrat naduh tynrai, bad 27 tylli ki nar post electric kiba la julor.
Ki bor pyniaid ki dang bishar bniah ia ka jingjulor katba ka kam ban ai jingiarap bad ban pynbha pat ka dang iaid shakhmat.
