Shillong, Lber 20 : U Symbud Myntri Rangbah ka Jylla ba khmih ia ka kam Pohiing Bah Prestone Tynsong ula ong ba ka kynhun tohkit kam pat lap satia ia kano kano ka jingdon jingiadei ka kam sain pyrthei ha ka jingkulmar ha ri-lum Garo, haba pyntip ba ka Sorkar kala pynkhlain ia ka jingpahara namar ka jingrakhe Eid ha ka thain.
“Ka jingtohkit ka dang iaid shakhmat. Ia mynta, ngam pat lah ong eiei. Ngin dang ban lap ia ka jingshisha. Ai ba ka jingtohkit kan iaid” ong u Bah Prestone haba iakren bad ki nongthoh khubor ha ka sngi Thohdieng haba jubab ia ka jingkylli la ka jingkulmar ha ri-lum Garo ka dei kaba kynshoit sain pyrthei.
Kane ka jingkynthoh u Bah Prestone kala mih hapdeng ka jingkyan ka jingiakynad ha ri-lum Garo, ha kaba ki kynhun seng kila byrngem ban nang iakhih lada ka Sorkar kam pynlait noh ia ki nongialam ba shah kem.
U Symbud Myntri Rangbah ula pyntip ba la bthah ia ki bor district bad ki Pulit ba kin nang trei bad peitngor bha namar ka jingwan jong ka Eid.
“Ngi la bthah ia ki bor district, bad kumjuh ruh ia ki Pulit ba kin kham trei shitom halor kane ka kam bad ban pynthikna ba ka jingrakhe ia ka Eid kan iaid beit iaid ryntih” ula ong.
