Agartala, Jymmang 19: Ki shijur kiba dei shi lok kiba trei hapoh ki bor pahara jong ka Tripura ki la shah kem hadien ba la saphriang bha ka video kaba la kynnoh ba la pyni ïa ki song pisa kiba heh bha hapoh ka ïing sah jong uwei u pulit langrut.
Kane ka jingjia ka la pynmih ia ka jingsngewkhia kaba jur na ki paidbah bad ki la pynlong ruh ia ka jingtohkit ha kaba iadei bad kane ka bynta.
Kine kiba la shah kynnoh ki dei kiba la tip kyrteng kum ka Menka Debbarma kaba dei ka pulit kynthei constable kaba trei ha Agartala East Police Station bad u Ajit Debbarma uba dei u jawan jong ka 14th Battalion jong ka Tripura State Rifles (TSR).
La kynnoh ba katei ka video kaba la la saphriang bha, ka pyni ia ki bun tylli ki song pisa, kiba la shlei ha kylleng ka madan jong ka iing, katba ia kawei ka kynthei riewlum, la iohi, ba ka shong hajan katei ka pisa. Ka video ka la saphriang stet ha ki lad pathai khubor bapher bapher, kaba la pynmih ïa ki jingkylli kiba sngewkhia halor ka ka pisa bad ka jingïadei kaba lah ban don bad ki kam be-aiñ.
Mar mar, ki pulit ka Tripura ki la pynlong ia ka jingtohkit bad kem ia 15 ngut ki riew shimet ha kaba iadei bad katei ka kam. Katkum ka jingong ki pulit, la tohkit ia kito kiba shah kem ban pynthikna ia ka jingshisha jong katei ka video, ia ka jinglong trai ia ka pisa, bad la don ne em kino kino ki kynhun runar ne ki jingpyniaid pisa beain.
Ki pulit ki la iathuh ba kitei ki shijur ki la shah kem halor ka jingkynnoh ba ki dei ki kam thok pisa ba la rejistar hapoh Salema Police Station ha Dhalai district.
Haba kren sha ki lad pathai khubor mynta ka sngi, u Inspector General of Police (Law and Order) ka Tripura u Manchak Ipper u la ong, “Ngi la register case bad sdang ka jingtohkit, haduh mynta ngim pat ioh kurup ia ka pisa, ngi la iohi ia ka pisa ha katei ka video kaba la saphriang bha, hynrei haduh mynta ym pat ioh kurup pisa, ka jingtohkit ka dang iaid shakhmat.”
