Shillong, K’lyngkot 09 : U Myntri Rangbah ka Jylla Conrad K. Sangma ha ka sngi Palei, u la ong ba ki jingbym don ki jingdonkam ba kongsan kiba dei ban don (logistics), ki dei ki diengpyngkiang ia ka jinglah ban kiew jong ka rep ka riang bad kiwei ki kam pynmih mar ha kane ka thain Shatei Lam Mihngi.
Haba kren ha ka jingrakhe Jubili Ksiar jong ka Indian Council of Agricultural Research (ICAR) ha Umiam, ula kyntu ia ka Sorkar Pdeng ban pynkhlain ia ki lad pyniasoh bad ki jingdonkam ba kongsan hapoh ka thain.
“Ka thain Shatei Lam Mihngi ka lah ban dei jaka pdeng ha ka kam pynmih jhur, ki marrep organic, tit, shynrai, sying bad ngap jong ka Ri, hynrei namar ki jingbym biang ki tiar ki tar bad ki jingdonkam ba donkam, ngim shym la lah ban pyndon kam pura ban pyniaid iew bha ia ki mar ba ngi pynmih” ula ong.
Ula pyntip b aka thain ka pynmih ia ki jait marrep kiba bun jait, kiba lah ban shalan sha kiwei pat ki sor hapoh ka Ri. Hynrei, namar ka jingbym don ki Cold Storage bad kiwei kiwei ki jingtei ba donkam, ia kine ki mar ym shym la lah ban shalan ha ka rukom kaba dei. Wat hapdeng kine ki jingeh, kiba bun ki mar na Meghalaya kila ioh ia ka iew ha dewbah Europe bad ha UAE khamtam u sohtrum, sohniamtra, sying bad u shynrai.
Ula pyntip ruh ba ka Sorkar kala trei ban pynkhlain ia ka kam rep kam riang da kaba kyrshan ia ki nongrep lyngba ki prokram bapher bapher bad ban kyntiew ia ki nongrep ba sengkam lajong ha ka rep ka riang.
Haba iaroh ia ka jingpyrshang ka ICAR ban pynlong ia ka jingwadbniah kat kum ka juk ha ka rep ka riang, ula ai khublei ia ka ICAR halor ka jingrakhe bad pynshlur euh ba kin nang iai bteng ban kyrshan ia ki nongrep hapoh ka thain.
Ula ban jur ruh ia ka jingdonkam ban iatreilang hapdeng ka ICAR bad ki bor Sorkar ban wanrah ia ki buit rep kat kum ka jingwad bniah sha ki nongrep ban lah iakhun ia ki khniang jingpang bad kiwei kiwei ki jingeh. Ula kdew ia ka jingpyut jong ki shylluid ba ktah ia ki diengkwai, kaba la pynjulor bun ia ki jingthung bad ktah jur ia ka kamai ka kajih ha kylleng ki bynta jong ka Jylla.
Ha kajuh ka por, u Myntri Rangbah ula kyntu ia ka Sorkar ba kan pynpoi ia ka Krishu Vigyan Kendras (KVK) sha ki shnong ki thaw, ka ban pynkupbor ia ki ba kin shim rai bad pyntyllun shakhmat ia ka kam rep kam riang.
Ka President ka Ri India Droupasi Murmu kala ai jingkren ha kane ka jingialang lyngba ka khubor ba shu record, naba kam shym la lah ban wan hi dalade. U Lat ka Jylla CH Vijayashankar, u Myntri ka Tnad Agriculture ka Sorkar Pdeng Shivraj Singh Chouhan bad ka Myntri kam rep ka Jylla kong Ampareen Lyngdoh, kila iadonlang ha kane ka jingrakhe.
Haba ai jingkren, u CHouhan ula ban jur halor ka jingdonkam ban don ka jingiatreilang hapdeng ka ICAR, ki Sorkar Jylla bad ki Agriculture Universities ban thaw ia ki buit treikam bad ki lad ki lynti kiba iadei bad ka jingdonkam jong ki nongrep.
