Shillong Jylliew 02: Hadien 8 sngi ka jingleit wad ia ki shi kurim kiba la jah rngai, ki pulit ka East Khasi Hills kila pynthikna ba ka metiap kaba la lap kadei ka jong u Raja Raghuvanshi, uwei napdeng ki 2 ngut ki nongjngohkai kiba la jah naduh ka 23 tarik u Jymmang.
Ia kane ka met, la lap na ka riat kaba don shapoh jongka Weisawdong Parking Lot ha Riat Arliang.
Ha ka kyrwoh khubor na u SP ka East Khasi Hills u Bah Vivek Syiem ula ong ba ha ka por kumba 11:48 Mynstep, ka drone kaba la pyndonkam da ki pulit kala lap ia ka metiap, lyngba ka jingwad kaba iatreilang hapdeng ki pulit, State Disaster Response Force (SDRF), Special Operation Team (SOT) bad ka West Jaintia Hills District Adventure Mountaineering Club.
U Bah Vivek Syiem ula pyntip, namar ka jingnoh bad jinglong riat ka jaka, ia ka metiap la wanrah noh sha ka Parking Lot ha kaba la leh ia ka Magisterial Inquest, da ka Kong Adiel R. Kyntan, MCS, Executive Magistrate ka Sohra, ha ka por 3:30 bad 4:00 mynsngi ha ka jingdonlang ki nongsakhi kiba na ka thain bad ki bahaiing jong une uba la khlad noh kiba la kam ba kane ka metiap kadei ka jongu Raja Raghuvanshi lyngba ka tattoo kaba la don ha ka kti kamon, kaba thoh “Raja.”
U SP ula pyntip ruh ba na katei ka jaka kaba la lap ia ka metiap, ki pulit kila ioh ia kawei ka sopti kynthei kaba lieh, shi sla u Pentra 40, ka bynta jongka LCD Screen jong ka Vivo mobile phone bad ka Smart Watch na ka kti jong une uba la khlad.
Ia katei ka metiap la pynkit noh sha NEIGRIHMS, Shillong ban leh ia ka post-mortem ban lap ia ka daw tynrai jong ka jingiap.
Ki pulit kim shym la kyntait ba ka lah ban don ka jingleh sniew bad kila shim ia kane ka jingjia bad suba jur ba kadei ka jingshah pyniap bad la thaw ia ka Special Investigation Team (SIT) ban pynlong ia ka jingtohkit.
Ym pat lah ban tip eiei shaphang ka kurim jong u Raja ka Sonam Raghuvanshi bad ki bor kiba dei khmih ki dang bteng ban wad ia ka wat hapdeng jong ka jingpynthud jong ka suinbneng bad ka jinglong riat jong ka jaka.
U Bah Syiem ula iaroh ia ka jingtrei shitom jong ki kynhun kiba leit wad ne Rescue Team bad pynpaw ba ka jinglap ia katei ka metiap kadei lyngba ka jingiatrei kaba khlem shongthait wat ha ka jingmad ia ki jingeh kiba bun.
U SP ula ong, ba yn sa ai shuh shuh ia ki jingtip kham hadien katba ka jingtohkit ka dang iaid shakhmat.
